Na opinion di Booshi Wever, Pueblo di Corsou a sacudi e fundeshi politico y estatal di Reino!

Pueblo di Pais Corsou, diabierna ultimo, den eleccion pa Parlamento a percura pa sacudi e fundeshi politico y estatal di Reino! Analistanan politico na Corsou a alerta di antemano cu e eleccion lo a bira un sorto di referendum na unda pueblo lo mester a duna su veredicto riba e acuerdo cu Gobierno di Corsou a firma cu Gobierno di Reino.

Un acuerdo cu defacto nifica entrega di autonomia na e.o. COHO pa medio di e Landspakket. Nos por bisa cu masalmente e pueblo di Corsou na prome lugar a rechasa e coalicion cu ta sostene Gobierno Rhuggenath PAR-MAN (-PIN), segun Booshi Wever di UPP.

Igualmente e pueblo di Corsou a rechasa e forma di proceder di Gobierno Hulandes cu a usa un situacion di pandemia pa impone cambionan inhumano y irrealistico.

Partido MFK lidera pa Pik Pisas a core un campaña mustrando cu e acuerdo cu Hulanda, particularmente cu a permiti Hulanda impone un organo Hulandes a la Westindische Compagnie, esta COHO, pa goberna e paisnan den Caribe, mester wordo renegocia cu Gobierno Hulandes.

Algo cu netamente nos tambe di UPP a bin ta vocifera desde aña pasa aki na Aruba. Diabierna 13 di november ultimo nos Gobierno, cu consentimento di nos Parlamento (sin move un dede), a entrega nos autonomia na Hulanda tambe.

Mescos cu na Corsou, nos pueblo tambe mester rechasa falta di transparencia di nos Gobierno y falta di curashi y profesionalismo pa atende cu e demandanan Hulandes.

Na Aruba tambe nos ta tende masha hopi mes cu mester bin un cambio, pero nos di UPP ta bisa cu e cambio aki no por atrobe ta simplemente di “geel” pa “berde”. E tradicionalismo politico, combina cu e fanatismo ciego, a pone nos den e situacion aki na Aruba.

Ora e pueblo di Corsou castiga politicamente, e ta haci esaki di un forma radical y ta percura pa cambia e constelacion di kendenan ta bin na mando.

Na Aruba nos castigamento ta mas bien den direccion di cambio entre dos partido tradicional. P’esey UPP ta spera, cu loke a pasa na Corsou, por ta un “eye-opener” pa votadornan den e siguiente eleccion na september proximo.

Cu na Aruba nos por realisa cu ta momento di un cambio na unda lo sacudi e fundeshi politico di Aruba y crea un dinamica nobo den politica.

UPP tambe ta na fabor pa nos renegocia cu Hulanda pa nos por haya nos autonomia bek. Pero tambe nos ta kere cu prome nos yega asina leu, nos mes aki na cas, lo mester haci e trabounan necesario. Esta di pone “ordo na cas prome” y esaki nos ta ofrece den e REBOOT 2.0, unda cu nos mester re-inventa gobernacion di nobo dor di bin cu reformanan den gobernacion di Aruba y tambe den nos sistema politico y democratico.

Segun Boshi Wever, nos no por pretende di kier cambia cos, si nos ta keda pensa di e mesun manera cada bes. Pero nos mester ta dispuesto pa cuminsa cu un capitulo nobo, no solamente na nivel politico, sino tambe den desaroyo di nos pais. Mester crea participacion, percura pa transparencia y carga nos Aruba cu un solo meta, esta pa nos hendenan ta felis dor di e.o. crea trabou y entrada digno pa cada uno cu ta biba riba e baranca aki.

Nos lo bay scucha partido AVP bay purba di convence pueblo cu nan ta contra di e acuerdo cu Hulanda. Nos no mester lubida sinembargo cu e acuerdo aki ta resultado di nan actuacion mediocre tambe como Gobierno. E gobierno di AVP a prefera di malgasta placa cu no tin y a hinca nos den un cataclismo nunca bisto.

E Gobierno POREDmep a priminti un cambio, pero a haci exactamente e mesun cos. Ningun di e Gobiernonan a percura pa cumpli cu nan palabracionnan ni tampoco percura pa traha reservanan pa ora un calamidad presenta. E pandemia cu nos ta aden no t’e unico motibo di nos situacion actual. E pandemia a acelera e resultado cu nos tin awe, esta di entrega di nos autonomia y presencia directo di Hulanda den nos gobernacion. Y Gobierno Hulandes, sabiendo cu nos ta lomba contra muraya a probecha di e situacion aki p’asina impone su condicionnan. P’esey nos ta bisa, re-negocia e acuerdo cu Hulanda, pero despues cu nos a drecha cos na cas y crea un frente nacional pa atende cu Hulanda. Y pa esaki ta necesario pa bin un cambio drastico den politica aki na Aruba, segun Booshi Wever den nomber di Partido Patriotico Progresista – U.P.P.