Notisia Tristu den historia di Boneiru, BOPEC deklará bankarota

KRALENDIJK–Korte ni e kuratòr tampoko a keda konvensí pa gerensia di BOPEC, ku BOPEC lo por a disponé di fondonan pa sigui ku operashon di e terminal i kumpli ku tur su obligashonnan finansiero, entre kual pago regular i na tempu di salario di e trahadónan i tambe kumpli ku e otro obligashonnan laboral, manera bashí premie, ets. 

E mesun tenementu na liña di e trahadónan pa sigur un aña largu, gerensia di BOPEC kier a usa tambe ku korte. Sin embargo ya despues di ménos ku un siman e kuratòr a mira e wega i a aserká korte pa deklará BOPEC fayit, lokual korte a honra tambe. Ku esei a yega un fin tristu na e operashon di e terminal dor di BOPEC N.V., un yu di PDVSA. Awor a keda pa e kuratòr atendé ku tur e kreditornan, esta tur esnan ku BOPEC debe, wak kuantu hende o instansia debe BOPEC i asina traha e balansa di e terminal.Ku esei lo bira posibel pa hasi un doorstart, esta kontinuá ku e kompania.

USIBO su pensamentu, kontinuashon bou di PDVSA òf un kompania ligá ku PDVSA ta parse nos masha difisil, si no ta imposibel. A keda e ora ei ku e kurator por buska un operador pa kontinuá ku e kompania òf un kumpradó pa kontinuá ku e kompania.

Esaki por sosodé “onderhands”, pues ta publiká i interesadonan por inskribí. E otro posibilidat ta pa bai findishi, esei lo nifiká benta públiko, USIBO lo vigilá kua di e opshonnan lo bai skohe pe. Den kualkier opshon USIBO lo yuda e dos sindikatonan pa buska e mihó interes di e trahadónan ku a pèrdè nan trabou. Un final tristu di un empresa ku 45 aña a kontribuí na ekonomia di nos isla, a krea trabou pa hopi hende pa motibu di un banda mal maneho (falta di mantenshon) i na e otro un banda guera polítiko riba nivel munidal a yega na su fin.

I mas tristu ta ku e trahadó i su famia no tin ni arte ni parte den e dos motibunan, pero si a bira viktima.

KIKO AWOR PA E TRAHADÓNAN

Tur e trahadónan di BOPEC lo risibí un karta di retiro di e kuratòr ku un “opzegtermijn” di seis siman. Ya USIBO a antisipá riba esaki i den un reunion virtual ku SZW huntu ku FEDEBON i BPWU a yega na un areglo ku kada trahadó no mester bai SZW bai yena formulario, ets. Via di e atministrashon di pago di salario di BOPEC lo kalkulá kuantu kada trahadó tin derecho riba dje i según ta palabrá te awor aki pa Djabièrnè 26 di mart awor e trahadónan lo risibí nan sesantia.

A palabrá tambe ku e montante lo ta nèto di moda ku e trahadó no tin ningun molèster pa loke ta asuntu di belasten. E salario di yanüari, febrúari 2021 i e bashí premie lo bai den e lista di esnan ku BOPEC debe i pago di e suma ei lo bai dura, esta si  tin sèn pa paga. Banda di esei USIBO ta sigui kere ku gobièrno di Boneiru, banda di e ayudo sosial ku nan a duna kaba, nan mester hasi tur esfuerso pa kumpli ku e desishon di Konseho Insular i konvensé Ulanda pa paga tur e trahadónan di BOPEC durante un temporada determiná sigur 80% di nan último salario.

E motibu p’esaki ta ku Ulanda no por bira lomba pa e trahadónan i nan famia, sigur nò pa e motibu ku dor ku Ulanda a sostené e sankshonnan ku Merka a imponé riba Venenzuela i esaki a opstakulisá en grandi ku BOPEC por a sigui ku su operahon normal i kumpli ku su obligashonnan finansiero, entre kua salario i otro kondishonnan laboral.Pues Ulanda tin un obligashon moral sigur pa duna un man. USIBO ta spera tambe ku e 9 miembronan di Konseho Insular ku unanimamente a para tras di e desishon, lo no bai drumi pero lo pone e preshon positivo nesesario pa Kolegio ehekutivo, esta gezaghèber i e tres diputadonan kumpli.

AKTIVIDATNAN DI USIBO

A pesar ku nos ta den un pandemia ku ta hasi imposibel pa fisikamente USIBO reuni, nos a reuní via zoom si i nos a atendé dos punto hopi importante, esta e partisipashon di trahadónan den nan empresa. Den un forma nobo, inovativo USIBO a interkambiá ku ekspertonan, kon nos por pusha un desaroyo den kua e trahadó den e empresa ta gosa di e rèspèt i rekonosementu di su balor i kontribushon ku e por duna den un desaroyo sano di e kompania. Un desaroyo ku ta garantisé e i su famia di por tin un trabou duradero, ya ku e kompania tambe lo tin un eksistensia duradero.

USIBO A INTERKSBIÁ KU BANKO MUNDIAL

Otro enkuentro ku USIBO tabatin ta ku un delegashon di BANKO MUNDIAL(WORLD BANK) Aki a interkambiá ku delegashon di Banko Mundial, ki efekto e pandemia a kousa den nos komunidat pa loke ta e aspekto sosial-ekonómiko pero mas importante kon nos ta bai fiha un maneho pa rehabilitá e desaroyo aki, esta kiko ta  nesesidatnan pero tambe ki strategia ta bai usa pa logra kubri e nesesidatnan nobo ku e pandemia aki a krea.

Djamars awor lo tin un enkuentro ku Fondo di Penshun Caribense, kaminda e sindikatonan ta bai haña amplio informashon tokante e Fondo i su futuro pa asina e miembronan di e FONDO  ta mihó informá i prepará pa loke ta desaroyo di nan penshun. 

Pendiente ta ainda e alfabetisashon tokante yenamentu di belasten on line ku dentro di poko lo bai inisiá. Meskos ta tambe un kurso ku USIBO tin pendiente pa loke ta miembronan di direktiva di e diferente sindikatonan i tambe nan shòpstiwartnan.