Situashon di COVID na CMC ta eskalá

WILLEMSTAD – Pa motibu di eskalashon di e situashon di Covid-19, Curaçao Medical Center ta kanselá tur operashon di awe djaluna 22 di maart i djamars 23 di maart ku no ta relatá na un emergensia. Pashèntnan lo risibí yamada di Departamentu di Planifikashon di CMC pa traha un otro sita.

CMC lo hasi un anunsio pronto si lo mester kanselá tur sobrá operashon di e siman aki. Tur sita na poliklínika si ta sigui normal.

Te ku djadumingu atardi e kantidat di pashèntnan infektá ku Covid-19 a yega un total di 23, di kual 11 ta den Kuido Intensivo i 12 ta den departamentu di Covid-19. Di e 23 pashèntnan, 4 ta di Boneiru pa motibu ku Kòrsou a ekstendé ayuda na nos hermana isla, Boneiru, ku no por akapará tur nan pashèntnan di Covid-19 den nan hòspital.

E oumentu di kasonan a pone ku Departamentu di Kuido Intensivo mester a bira kompletamente dediká na Covid, mientras pashèntnan di Kuido Intensivo ku no ta relatá na Covid a wordu trasladá pa Departamentu di Kurason (CCU). Speshalistanan a tuma nota di un oumento di pashèntnan mas jong entre edatnan di 30 i 40 aña, kual no tabata e kaso promé.

Esaki posibelmente ta un resultado di e variante nobo Britaniko. CMC a tuma nota ku hopi pashènt infektá ku Covid ta akudiendo na Sala di Emergensia sin tuma kontakto ku nan dòkter di kas promé. CMC ta supliká komunidat pa tuma kontakto ku dòkter di kas si tin síntoma di Covid i no bin Departamentu di Emergensia sin ku esaki ta nesesario pa asina evitá plamashon.

Dòkter di kas lo avisá si mester bai emergensia i lo asistí den e proseso. Si bo ta kalifiká pa risibí bo bakuna, por fabor traha bo sita via www.bakuna.cw pa asina yuda protehá nos komunidat.