Despues di discusion den supermercado, tironan a cay den Pos Chikito

Diadomingo anochi pa mas o menos 7’or Polis a ricibi informacion cu un auto lo a pasa y los tiro. Mesora esnan cu a presencia esaki a tuma contacto cu Polis.

Den algun minuut diferente unidad policial a cuminsa yega unda e incidente a tuma lugar.

E vehiculonan envolvi lo ta un Mitsubishi color cora y un Hyundai Getz color shinishi (tinted glass).

Mientras cu Polisnan a bay unda e habitante a presencia e tiramento un otro informacion a drenta mesun momento cu, na un otro adres a yega un persona bisando cu nan a tira riba dje.

N’e sitio testigo(nan) a bisa Polis cu e tironan lo a sali for di Mitsubishi color cora y esun cu a tira ta un persona color scur.

E problema lo a start den un supermercado den Pos Chikito, dos persona den e Mitsubishi color cora lo a busca e persona cu nan a tira riba dje den e supermercado. 

P’e motibo aki Polisnan a bay e supermercado p’asina compila mas dato posibel, manera imagennan di security cameras.

Vehiculo di e victima lo a ricibi un impacto di bala parti dilanti.

Ariba e imagennan cu nos ta presenta por mira Polisnan buscando evidencia, pues si por localisa huls.

Pero te n’e momento ey no a haya nada, indicando cu probablemente e shooter lo a usa un revolver.

Revolver no ta benta e huls afo.

Tur e departamentonan concerni manera BFTO y Recherche a wordo poni na altura y a presenta pa start un investigacion di e caso aki.