MEP sorprendi formalmente pa actividad di AVP dia Himno y Bandera

Despues cu lider di MEP, Evelyn Wever Croes,  aña pasa a anuncia cu campaña electoral di su partido a inicia durante di un anochi di reunion na cede di e partido na Santa Cruz, partido AVP diahuebs ultimo a inicia cu su campaña electoral, cu diferente actividad promocional riba Dia di Himno y Bandera.

Ya for di mainta tempran banda di 7’or, e partido a inicia cu varios actividad protocolar na Plaza Betico Croes, Plaza Shon A Eman, Plaza Henny Eman, Plaza Juancho Enrique Irausquin y Plaza 18 di Maart, cu ponemento di krans caminda a gara partido MEP totalmente for di balans.

Tur e actividadnan di AVP a tuma lugar prome cu e actividad protocolario riba Plaza Betico Croes di Gobierno y cu despues partido AVP a sigui cu bendemento di cuminda y bolo sistema di drive-thru na Cas di Partido na Oranjestad, como tambe accion di pegamento di sticker eynan tambe, na Tanki Leendert y tambe na San Nicolas.

Tur e actividadnan aki a wordo atendi den bon forma y mesora por a ripara cu esaki a sorprende principalmente esnan di partido MEP formalmente ya cu reaccionnan riba medionan social tabata mustra un esfuerso grandi di politiconan di MEP, tratando na bagatalisa e actividadnan aki, cuestionando e forma con esaki a tuma lugar.

Hasta Prome Minister a mustra cu el a sinti e efecto di e actividadnan aki formalmente, tratando na culpa lider di partido AVP, cu a yuda na plama Covid 19 cu e actividadnan aki, mientras cu tur esaki AVP a  mantene mas tanto cu por tur e reglanan vigente.

Tin medio di comunicacion cu un tempo tabata enemigo di MEP y cu awor t’e aliado di mas grandi di e partido geel, a habri afo contra Mike Eman, confirmando informacion di algun luna atras, caminda e meta di campaña di partido MEP, lo enfoca totalmente riba y rond di Mike Eman.

Un biaha mas a trece informacion dilanti pa desacredita e lider di AVP, pero cu simplemente no tin base y no tin sentido mirando cu en berdad Mike Eman a retira como lider di AVP despues di resultado di eleccion 2017, pero algun tempo despues Congreso di e partido, pa aclamacion a haci un apelacion riba su persona p’e keda como lider di e partido, loke el a acepta tambe.

Den ultimo dia por mira hopi reaccion riba social media di hendenan liga n’e partido MEP, cu ta haci observacionnan comosifuera e derota di nan Gobierno ta algo sigur, algo cu no por wordo evita y cu pueblo lo vota pa un cambio na luna di september benidero.