Mester stop di dramatisa cu mortonan dor di Covid-19

Rond mundo y aki na Aruba tambe, tin cantidad di experto riba tereno di corona virus, kendenan sa precisamente kico ta pasando y kico tin cu haci, mientras cu tin tantisimo expertonan rond mundo, cu ainda no por saca nan som di e existencia y forma di procede di Covid-19.

Sinembargo mescos cu tur caminda, aki na Aruba tambe diariamente por ricibi informacionnan riba e pandemia aki, di miembronan di famia, amigo y conocirnan, di miembronan di un of otro ‘chat-group’, pero tambe di esnan den prensa, cu a converti e pandemia aki den un tipo di noticia sensacionalista di nan mes.

Ta for di algun tempo caba AWEMainta a mustra riba e particularidad aki, caminda Gobierno tambe tabata atende e pandemia aki, sembrando panico, sembrando intrankilidad sea cual sea e motibo, loke sin duda no ta algo positivo.

Despues di celebracion di Dia di Himno y Bandera, un biaha mas tin cierto grupo cu a lansa gritonan di panico for di oranan prome cu e dia aki, cu a wordo celebra extensamente pa un pueblo cansa y fada di ta sera den cas, cu lo tin un aumento grandi y cu ta rekeri medida estricto mesora.

Sin cu tabatin cifra den man, a core grita cu pueblo ta iresponsabel, cu pueblo mester ta mas serio, cu pueblo mester biba segun reglanan impone, apesar cu esaki ta nifica cu e ta mishi cu libertad sagrado den un pais liber y democratico.

Desde e momento ey Gobierno y su Crisisteam a trata di sacudi tur hende formalmente, papiando di un crisis cu ora cu analisa tur cos riba un rij, e no ta nada serio y simplemente un aumento normal di e casonan aki, si sigui e trend di e casonan aki for di luna di maart di 2020 ora cu tur cos a cuminsa aki na Aruba.

Luna di maart ta cumpli un aña pasa cu e virus aki a duna acto di presencia aki na Aruba y por spera cu otro aña na luna di maart un biaha mas, lo tin un otro ‘spike’ di e casonan aki, mescos cu e tradicional casonan di griep normal cu nos conoce, tambe e temporada cu bruhela y sarampi ta lanta cabes den comunidad.

Por a scucha varios instancia papia di e cifra halto di morto ocasiona pa Covid-19, usando un biaha mas e cantidad di morto aki, como un instrumento pa spanta pueblo, pero ta lanta e pregunta, menos hende lo a muri si tur hende a keda den nan cas y no a sali bay ningun caminda?

Hecho cu ta ora cu analisa e cantidad di casonan di hendenan cu a bay pa Reino di Dios, hendenan cu a fayece den e luna di maart di 2021 te cu e fecha di 19, nos ta realisa cu un total di 51 hende a fayece casi mey mey di luna, caminda compara cu 81 morto den henter un aña di Covid-19, sin duda no ta duna un refleho dramatico di e situacion aki.

Un total di 51 morto den algo mas cu mitar luna di cual practicamente tur ta hendenan di edad halto y ta mesun trend ta continuando, sin cu por punta dede cu t’e corona virus cu culpabel pa asina hopi morto.

E tipo di informacionnan aki tin cu wordo atende den e forma corecto, ya cu mientras cu ta pidi pa mas medida, cu ta pidi pa lockdown, den mesun rosea ta pura pa economia cuminsa draai, cu turismo lanta cabes, cu tur hende ta regresa na pia di trabou y cu cosnan ta cuminsa draai ta sali for di e situacion financiero penoso den cual Aruba y henter mundo a bin haya su mes aden.