Minister recaudando fondo pa campaña na adres y telefon di oficina di Gobierno

AWEMainta a ricibi informacion di maniobranan cu Ministernan di e actual Gabinete ta haciendo pa nan campaña electoral, buscando fondonan financiero cu mester sirbi pa atende cu e propagandanan cu e candidatonan tin cu haci.

Manera ta conoci pa hopi aña caba un gran cantidad di politiconan a yega di traha via di un fundacion cu mester percura pa recauda fondo pa campaña politico y otronan cu ta simplemente tene un benta di cuminda, maneras bbq entre otro, p’asina acumula fondo cu cual nan lo promove nan candidatura p’e proceso electoral.

Ta conoci tambe cu den algun caso di investigacion manera esun di ex Minister Paul Croes, Ministerio Publico a hasta investiga e fundacion di e politico aki, hasta acusando e ex mandatario di lo a comete malversacion cu su propio fundacion.

P’e proximo campaña electoral na luna di september benidero, tambe politiconan a cuminsa cu diferente actividad pa recauda fondo p’asina por cubri costo di e campaña cu nan kier hiba, pa yega cu nan programa mas tanto posibel den henter pueblo.

Sinembargo no ta tur actividad por conta cu sosten di comunidad, sigur ora c’un politico cu ainda ta sirbiendo un posicion publico, ta dicidi di haci uso di propiedadnan di pueblo, pa atende cu su campaña pa recauda fondo, mientras cu esaki ningun momento por ta aceptabel y ta algo cu mester condena severamente.

Den fin di siman for di fuentenan yega n’e propio Gobierno, AWEMainta a ricibi algun informacion di un campaña di Minister di Salubrdad y Turismo, Dangui Oduber, pa loke ta su accion pa recauda fondo p’asina ehecuta su promocion.

E accion di recaudacion ta bay via di medionan social cu ta carga e homber di “Minister Honesto” y cual aviso ta papia di su logro- y maneho como Minister, pero loke a resalta den esaki, t’e hecho cu e Minister a dicidi di usa oficina di Gobierno, ya cu e adres cu el a pone riba e propaganda pa recauda fondo, ta di L.G. Smithboulevard 76, cu ta edificio di Cocolishi y acerca e mandatario ta haciendo uso di telefon di Gobierno, ya cu el a pone e number 528-4900 p’asina e proceso di recaudacion di fondo por tuma lugar.

E Minister Honesto aki, manera su aviso ta mustra, simplemente no ta honesto ya cu si acaso Dangui tabata honesto cu pueblo, sigur den e tempo dificil aki, lo su persona como politico cu ta pertenece na partido MEP, lo mester a usa e facilidad di su partido na Santa Cruz y usa e telefon di e cede aki p’asina yega na placa.

E aviso tambe ta mustra esnan cu ta interesa pa haci un donacion, riba un cuenta di un banco locual caminda mas ariba por lesa e lema di: “Yuda Dangui pone Aruba riba e nivel mas halto cu bo contribucion,”  locual sin duda no a cay den bon tera cerca hopi hende den comunidad.

Awor por pretende di bisa cu hopi a haci mesun cos den pasado, pero t’e Gobierno di Dangui Oduber a papia di integridad, a papia di transparencia den gobernacion, a acusa cantidad di rivalnan politico pa supuesto actonan coruptivo, pero e tipo di accion aki tambe ta un forma di corupcion ya cu ta trata aki di propiedad di publico, propiedad di pueblo cu ta wordo usa pa campaña personal, loke sin duda ta inaceptabel. E ta keda un acto coruptivo y Ministerio Publico no ta haci nada?