Otro sospechoso den Hato Shooting a kai!!

WILLEMSTAD – Djabièrne dia 19 di mart ku tabata dia di elekshon na Kòrsou, Ministerio Publiko a haña konfirmashon ku hustisia na Inglatera a detené un Kurasoleño kende ta sospechá di a forma parti dje gèng ku a kousa un tiroteo mortal na Hato pa likidá miembro di un gèng rival.

E detenshon di e sospechoso C.S.H. (50) a sosode riba petishon di Ministerio Públiko di Kòrsou na Londres.

Ministerio Públiko Kòrsou a pidi hustisia na Reino Uní pa detené C.S.H. por medio di un petishon di asistensia hurídiko den e investigashon grandi yamá Themis. Detenshon di C.S.H. t’e di 8 detenido den un korto tempu. Anteriormente den e investigashon aki tabatin 3 detenshon na Kòrsou na luna di novèmber2020, febrüari i mart 2021.

E detenshon di mas resien a tuma lugá djasabra 13 di mart kaminda a detené S.A.P. di 36 aña ku a biaha via di Repúblika Dominikana pa Kòrsou.

Ta sospechá ku C.S.H. ta forma parti di e organisashon yamá No Limit Soldiers (NLS).

Ministerio Públiko ta sospechá ku NLS ta un kolaborashon kriminal i ta tene e organisashon responsabel pa diferente asesinato kometé den Reino Hulandes i pafó di esaki.

Tambe ta sospechá ku e organisashon tin hopi aña ta dediká nan mes na narkotráfiko internashonal.

Segun sospecho di Ministerio Públiko, ta danki n’e kolaborashon internashonal ku Reino Uní ku por a aresta C.S.H., un miembro prominente di e organisashon.

Ta sospechá cu C.S.H. tabata kordinadó di asesinato i tabata direktamente involukrá den dunamentu di òrdu di diferente delitu di violensia entre otro na St. Maarten. Despues di investigashon a sali na kla ku C.S.H. tin basta tempu ta biba na Londres i ku e tin un negoshi aya nan, Ministerio Públiko a hasi petishon na Reino Uní pa su detenshon.

Djabièrne 19 di mart un tim spesial di Metropolitan Police a detené den su bibienda na Londres.

Riba petishon di Ministerio Públiko tambe tabatin entrada hudisial n’e bibienda i den su negoshi na Londres.

Ministerio Públiko a hasi un petishon di ekstradishon di C.S.H.

Operashon Themis ta un investigashon di hechonan kastigabel kometé den diferente pais den Reino Hulandes i otro pais pafó di esaki.

Speshal p’e investigashon aki a forma un tim di reshèrshi ku ta konsistí di miembro di kuerponan polisial di Sint Maarten, Kòrsou, Aruba i tambe e Tim di Koperashon di Reshèrshi (RST).

E tim aki ta kai bou di mando di Ministerio Públiko di Sint Maarten i Ministerio Públiko di Kòrsou.

Na november di 2020 Interpol a arestá Shurandy  Quant na Dubai i kende ta ser sospechá di a duna òrdu pa likidá i sekuestrá atversarionan. Ta Ministerio Publiko  pidi pa aresta Quant.

E likidashonnan a tuma lugá den diferente pais i Quant den archivo di hustisia ta un lider di e gèng No Limit Soldiers (NLS) di Koraal Specht. Luna pasá a arestá otro sospechoso di 40 aña na Kòrsou lokual ta yudando outoridatnan pa resolvé diferente likidashon i a e satisfakshon ku e famianan ta pidi pa kapturá e matonnan.