RADEX BCMS a bai wordo implementa na St. Lucia

RADEX BCMS a wordo selecta dor di Gobierno di St. Lucia pa wordo implementa manera nan programa di control y maneho di frontera. Un lider den e control y maneho di frontera pa hopi aña,

RADEX BCMS a wordo desaroya dor di compania local, Gamma IT Solutions y ta un parti esencial pa yuda Gobiernonan y departamentonan di Immigracion y Turismo cu ta busca e manera mas efectivo pa ofrece seguridad, confiansa, stabilidad y inovacion na nan paisnan. RADEX BCMS t’e solucion pa por logra esaki.  

Gamma IT Solutions, cu t’e compania lider den desaroyo di software den Caribe, a desaroya RADEX BCMS pa yuda e Gobierno di Aruba proteha e frontera di e isla. RADEX BCMS ta uza e hardware y software di mas moderno pa ‘multi-biometric capture’ y opcionan di buskeda y registracion. E sistema ta traha cu cantidad extenso di modulonan.

RADEX BCMS ta conta cu: Un modulo di turismo integra cu ta colecta e data di bishitantenan y cu ta disponibel inmediatamente n’e autoridadnan di turismo cu tin como meta stimula e crecemento di turismo. Esaki ta clave p’e sector di turismo, dor cu e por ofrece informacion relevante pa ora di haci e planning pa cu marketing  y pa ora di tuma medidanan relaciona na turismo. Ademas, e ta provee estadisticanan y informacion n’e instacianan dedica na turismo di un pais.  

E ta integra completamente cu e plataformanan di Imigracion manera e Online ED Card y carchinan di turismo. E ta procesa biaheronan den un tempo asombroso di 10 seconde. E ta completamente integra cu e ‘wanted lists’ local y internacional. E tin un cantidad grandi di reportenan disponibel. Awor, un par di aña despues cu RADEX BCMS a wordo desaroya, RADEX BCMS a wordo selecta pa Gobierno di St. Lucia pa wordo implementa na nan pais.

Frank Baks, Director di Business Development na Gamma, ta comparti: “Nos team ta sumamente orguyoso pa a wordo selecta p’e proyecto aki. Tur partido envolvi ta masha excita pa lansa RADEX BCMS na St. Lucia. Nos ta gradici n’e Ministernan di Husticia y Turismo, e Departamento di Imigracion y tur e conseheronan envolvi pa a selecciona RADEX BCMS. Actualmente, nos ta presentando nos software na mas pais di Caribe y nan ta hopi impresiona cu e software, dus nos tin confiansa cu e lo wordo implementa den hopi mas pais.” Gamma IT Solutions ta exportando nan software pa mas di 25 aña caba y ta satisfecho di por mira nan producto, manera RADEX BCMS, yega otro mercadonan den Caribe.