Alvin Molina probablemente lo ta proximo Minister di Husticia pa partido MEP

Campaña politico ta sigui crece segun dianan ta pasando cu partidonan politico trahando duro pa prepara nan mes pa convence pueblo, pa duna nan sosten p’asina por haya posibilidad den gobernacion y ehecuta asina nan vision cu nan tin.

Dialuna merdia a bira conoci cu lo tin un partido nobo cu lo participa den e proximo proceso electoral y ta trata aki di e partido Pueblo Prome, cu lo ta bou di guia e conocido ciudadano Michael Williams, kende pa añanan largo caba, ta hibando oposicion principalmente den medionan di comunicacion, contra Gobiernonan cu tabata na mando.

A firma e acta notarial caminda lo cana e caminda legal p’asina e partido por haya su reconocimento pa e por participa den e proximo eleccion cu lo tuma lugar na luna di september proximo.

Mientrastanto informacion ta sigui drenta na AWEMainta riba diferente partido y probabel candidatonanm cu lo wordo presenta manera por ehempel ta un hecho cu partido AVP p’e proximo eleccion, lo tin 12 politico nobo, hopi di nan hendenan hoben cu ta dunando un aporte caba na e vision di e partido con e lo bay atende cu e situacion den cual e pais ta pasando aworaki.

Mientras cu partido MEP lo tin rancamento di cabuya tumando lugar segun informacion for di propio seno di e partido geel, caminda ta mustra cu como sucesor di Minister di Husticia Andin Bikker den e posibel siguiente Gobierno di MEP, lo no ta Parlamentario Rocco Tjon manera tabata e pensamento, tanto cerca su votadornan como su propio persona.

E candidato cu e partido lo kier pusha dilanti pa bira Minister di Husticia den un posibel siguiente Gobierno t’e oficial di Polis Alvin Molina manera cu AWEMainta a publica siman pasa caba, kende lo por conta cu mas sosten di miembronan di seno policial, cu ta e caso cu Parlamentario Tjon.

AWEMainta por a compronde cu tin un tipo di disgusto den Cuerpo di Polis p’e hecho con Parlamentario Rocco Tjon como ex miembro di Cuerpo di Polis, a dicidi di sostene ‘Landenpakket’ presenta pa Hulanda y a vota na fabor di esaki, den cual interes di Polisnan ta wordo atacha formalmente.

Ta un hecho cu e acuerdo aki ta mishi cu autonomia di Cuerpo Policial caminda oficialnan di RST ta cana kibra na Aruba, ta dicidi kico tin cu wordo haci y miembronan di Cuerpo Policial di Aruba, tin cu duna tur cooperacion.

A ser mustra na AWEMainta cu si Parlamentario Rocco Tjon y su fraccion a dicidi di acepta tur loke Hulanda dicidi ariba y den e caso aki lo mina autonomia di hasta Cuerpo Policial ta su asunto, pero a spera mucho mas sosten di Tjon pa evita tur loke ta pasando den e ultimo aña aki cu Polisnan.

Cuerpo Policial di Aruba t’e unico cuerpo den Reino Hulandes cu mester a entrega parti di nan salario durante di e pandemia y nunca a scucha Rocco Tjon pidi Gobierno claridad riba e asunto aki of sikiera haci un esfuerso pa demostra solidaridad cu Polisnan cu riba dje ainda no a ricibi vacuna.

Pues ta mustra cu e sosten cu Rocco Tjon a ricibi den ultimo eleccion di 2017, lo no ta mesun cos di parti di miembronan di Cuerpo Policial  mirando tur loke a bin ta pasando den ultimo cuater añanan.