Guarda nos Costa cu uniform y mobilofoon nobo

Recientemente personal di Guarda nos Costa a haya mas uniform nobo. A pidi Minister Andin Bikker si por considera pa bestel mas uniform pa nan. Tambe a pidi pa mas radio pa promove mihor comunicacion. Ayera mainta e mandatario a entrega e cargamento nobo di uniform y mobilofoon na Guarda nos Costa.

“Ta importante pa cumpli cu locual priminti. Mi ta conoci pa semper ta busca solucionnan pragmatico”, asina Minister Bikker a bisa ayera mainta. E mandatario a subraya cu den tempo di pandemia ta masha dificil pa aloca fondonan, pero cu el a haci tur esfuerso pa tog realoca e poco fondonan disponibel pa brinda empleadonan di Guarda nos Costa mas y mihor herment di trabou.

Ta bon pa resalta cu Guarda nos Costa a pasa den henter un cambio cu Andin Bikker como Minister di Husticia, Seguridad y Integracion. A renoba e edificio existente band’i Brandweer na Aeropuerto, a renoba ex-edificio di Huis van Bewaring, a busca auto nobo pa garantisa mihor transporte, a cumpra uniform nobo y a zorg pa mobilofoon. Pa logra e inversionnan aki, a percura pa aloca hopi fondo for di presupuesto di Gobierno mes y fondo adicional di Hulanda.

Ex-Minister Rudy Croes a institui Guarda nos Costa na aña 2003 pa por combati e retonan cu ilegalidad riba nos isla. E departamento a pasa bou di DINA, Cuerpo Policial, IASA y desde 2019, Minister Andin Bikker a hacie un departamento independiente riba su mes.