Na luna di mei proximo lo fix Minister Chris Romero den su funcion nobo

Despues di publicacionnan di AWEMainta riba e futuro politico di Minister Chris Romero, e reaccionnan tabata impresionante for di tur skina, hopi sorprendi, pero tambe hopi  desilusiona p’e forma con un Gobierno mes ta regla su mes cu e tipo di nombramentonan aki. Maske cu e propio Minister Romero a bin ta bisa cu AWEMainta ta bin cu fake-news, nos no tin duda den nos fuentenan.

For di propio hendenan yega na Minister Romero, a ser mustra cu ya caba e mandatario a anuncia su  retiro como Minister pa luna di mei y cu tur hende tin cu busca nan propio destino, sea cu nan ta bay nan trabou anterior bek of tin cu busca algo otro pa haci.

Na mes memento a ser mustra cu p’e tempo aki, e Landsverordening cu lo oficialisa San Nicolas Ports Authority & Industrial Development NV caminda tin tur indicacion cu Romero lo bira Director di e departamento aki, pa cual e lo tin algun luna caba presionando pa lanta e compania aki p’asina e bandona politica definitivamente. Pero mester wordo aproba ainda pa Parlamento di Aruba.

Supuestamente e Minister lo a anuncia di su decision caba na personal di su departamento caminda ya tin cu algun cu lo a bandona e oficina y bay bek pa nan trabou anterior mirando cu dentro di algun siman mas, nan lo no ta trahando p’e mandatario mas.

Pues tur cos ta mustra cu lo no tin ‘open solicitatie’ p’e puesto aki, pero di otro banda ta ser mustra cu Minister Romero no tin experencia riba tereno di nabegacion, ya cu prome cu el a bira miembro di Parlamento y despues bira Minister den Gabinete Wever Croes, su persona tabata maestro di scol, pues ta carece di e experticio adecuado pa carga e responsabilidad aki.

Fuera di su falta di experticio pa loke ta nabegacion e otro asuntonan cu ta cay bou di su responsabilidad, ta entre otro maneho di terenonan industrial, terenonan destina pa plantacion y tin cu dirigi e waf di container.

Na mes momento Romero den e funcion nobo aki lo ta encarga pa maneho di e casnan na Colony pues tur ta mustra di ta topiconan cu sin duda no ta locual e mandatario aki tin experiencia of conocemento amplio aden pero e lo haya mas hende  rond di dje y ta mas cu claro cu e departamento nobo aki, lo tin algun vacatura den e departamento aki cualnan casi sigur lo wordo yena cu hendenan yega na partido, pues un biaha mas e conocido ‘friends & family’. 

Awor tin cu warda e Landsverordening pa oficialisa e departamto nobo aki, pa Parlamento aproba y tambe tin cu warda luna di mei yega pa mira si enberdad Chris Romero lo retira como Minister di Gabinete Wever Croes. Su intencion no ta pa subi lista adi MEP un biaha mas.