Polis a detene 2 di e 3 hobennan sospechoso di e atraco riba e snacktrucknan

Despues di e dos atraconan, riba Well Done Snacktruck na Tanki Flip y Ruiz Take Away na Tanki Leendert, varios unidad di Polis a mobilisa y tabata coriendo rond buscando un Nissan March den cual probablemente e atracadornan lo tabata.

Durante Toque de Queda, algo despues di mey anochi, Polis cu ya caba tabatin un pista di ken e atracadornan aki por ta, a cuminsa circula den area di e casnan di e hobennan sospechoso aki.

No a dura mucho cu enberdad, algo despues di mey anochi den Caya Tumba, un patruya di Polis a bin topa cu un Nissan March preto, mesora el a wordo para. Den e auto enberdad nan a bin topa dos di e tres sospechosonan di atraco. E hoben Chines y un otro.

E agentenan n’e sitio mesora a pidi refuerso di nan coleganan pa yudanan lista nan y tambe a busca den e auto.

Aki ta caminda nan a bin haya tur e evidencianan cu nan tabatin mester pa a detene e dos sospechosonan aki. Mas sigur e otro sospechoso hopi liher lo wordo busca of lo mester entrega su mes, paso autoridad sa caba ken e ta.

Ambos sospechoso a wordo hiba di biaha pa Warda di Polis, caminda nan lo mester presenta dilanti Sub Fiscal y mas sigur por lo pronto nan lo keda tras di tralie.