Tres cama so falta pa Cuido Intensivo yega su capacidad maximo

Ayera mainta gerencia di HOH ta trece dilanti estadistica y informacion adicional di estado actual pa cu e pandemia na Aruba. E situacion ta hopi serio. Director Jacco Vroegop a splica cu na momento di e conferencia di prensa, tabatin 34 pashent di COVID interna di cual 12 ta den Cuido Intensivo. Banda di esaki, tin tres pashent cu no ta di Covid cu tambe ta interna den ICU.

E preocupacion ta cu e capacidad maximo di ICU ta 18 cama, loke ta nifica cu tin solamente tres cama mas posibel. Mas pashent tin interna den ICU mas presion e ta pone riba e personal, pasobra mester tin un profesional pa cada pashent.

Presente n’e conferencia di diamars mainta tanata Presidente di Raad van Bestuur drs. Jacco Vroegop, kende a lidia e conferencia y despues a pasa palabra pa longarts drs. Selene Kock y drs. Bert Rodenburg entre otro pa contesta pregunta.

Acerca presente tambe tabata Mw. Sinead Geerman (Hygiëne & Infectiepreventie HP) y Mw. Gina Maduro (ABV y SEH-Verpleegkundige).

Drs. Jacco Vroegop a cuminsa ta splica e situacion di cantidad di pashentnan na hospital actualmente; di e 548 casonan positivo cu ta activo, tin 12 den ICU (Intensive Care Unit) + 3 pashent no relaciona cu coronavirus, y acerca 22 pashentnan riba otro piso cu no ta den ICU ricibiendo cuido pa cu e virus.

N’e momento e capacidad pa ricibi pashent den ICU ta 18 y pa diabierna e lo expande na 22, di e 35 puestonan maximo cu tin. Encuanto e capacidad di cuido medico riba otro piso cu no ta ICU ta conta cu 148 cama clinico. Tin 548 caso activo andando, cual ta mas o menos 6.5% di e casonan cu a sali positivo di hende cu a test aki na Aruba.

Total 8800 hende a test positivo desde cu e pandemia a cuminsa, cual ta un 7.32% di henter e poblacion Arubiano. E edad averahe di hende cu ta wordo afecta ta 61.54 aña pa hende homber y 61.62 aña pa hende muher.

Drs. Jacco Vroegop tambe a splica cu hopi hende obeso ta wordo afecta mas tanto. 60% di personanan cu ta positivo ta obeso. Tin un problema grandi di obesidad na Aruba cu ta haci e cuido di pashent na hospital hopi mas dificil compara cu un persona cu un BMI (Body Mass Index) saludabel.

Longarts drs. Selene Kock a conta cu recien tabatin mester di asistencia di 6 enfermera/o adicional, esta 8 total, pa yuda un pashent den cuido. Normal ta 2 maximo cu ta asisti pashent band’i cama. Tambe esaki ta trece risiconan adicional di salud cu ta haci recuperacion mas dificil.

Den total tin 82 persona cu a fayece na Aruba dor di Covid-19, 10 di nan a fayece pafo di hospital y 72 den cuido medico na hospital.

Di e 1143 trahadornan na hospital, 204 a sali positivo total (mas o menos 18%) cu 2 activo actualmente y 6 den cuarentena. 47 trahadornan (23%) di esaki no tabatin contacto cu pashent y 157 trahadornan (77%) si tabatin contacto cu pashent.

Lamentablemente tin hopi persona cu no ta honesto cu e trahadornan y enfermeranan na hospital ora ta wordo puntra p.e si nan a yega di ta positivo den pasado, pero mas importante si nan a yega di tin contacto cu hende positivo recien y hopi ta nenga di duna informacion corecto of no kier duna contesta. Asina hopi di e enfermera y trahadornan a resulta positivo p’e virus.

Hospital ta pidi n’e pashentnan pa por fabor ta honesto y duna informacion corecto ora di haya pregunta pa preveni plamacion inecesario.

Di e 34 pashentnan positivo den cuido na hospital, 3 a ricibi e prome dosis di e vacuna. Despues di e prome vacuna e ta dura un promedio di 2 pa 3 siman prome cu e vacuna ta proteha cu un rate di 82%. Esaki ta nifica cu ainda no ta bon protehi contra e virus y cu ainda no por stop di sigui protocol pa cuida contra dje, sikiera te cu un poco despues di ricibi e di dos vacuna.

Despues di 1 pa 2 siman di ricibi e di dos vacuna lo ta proteha cu un rate di 95% contra e virus (Pfizer).

807 Trahador den cuido medico na hospital di e 1143 total a wordo vacuna; 605 a haya e prome cu di dos vacuna y 202 mester haya e di dos vacuna ainda.

A haci e pregunta na drs. Jacco Vroegop di pakico tin un gran porcion ainda di trahadornan na hospital cu no kier tuma e vacuna. E contesta ta keda mescos, tanto pa personanan cu no ta traha na hospital cu pa trahadornan den cuido – tin di nan lo kier warda te ora e vacuna ta mas ‘sigur’ pa loke ta trata e efectonan secundario y tin e opcion pa nenga pa tum’e. Esaki ta un poco preocupante ya cu nan ta trata pashentnan directo y no ta bon proteha contra e virus, cual ta hisa e riesgo di plamacion.