Tres hoben, un Chines y dos local, a tira dos atraco arma den menos cu mey ora di tempo

Dialuna durante ora di cierre, dos snacktruck ta bira victima di atraco arma. Ta trata di Well Done Snacktruck pariba di rotonde Tanki Flip y algun minuut despues Ruiz Take away pariba di rotonde Tanki Leendert.

Tabata den careda di 11’or di anochi, e dama cu ta traha na Well Done Snacktruck a wordo sorprendi pa tres atracador basta hoben. Tur tres tabata bisti na preto, un tabatin un arma di candela y e dos otro nan tabata den pocesion di un cuchiu. E señora a spanta y despues di a duna nan e 200 florin cu tabatin den e caha nan a bandona e sitio.

Mas o menos 15 minuut despues, Ruiz Take Away pariba di rotonde Tanki Leendert, tambe ta bati alarma, pa motibo cu nan tambe a bira victima di atraco. E mesun tres atracadornan hoben a bay na Ruiz Take Away y aki tambe despues cu nan a haya locual tabatin den e caha, nan a bandona e sitio, nan a bay na pia direcion zuid patras di Ruiz Take Away.

Na Well Done Snacktruck nan a bay cu 200 florin cu tabatin den e caha y na Ruiz Take away nan a haya solamente 100 florin mirando cu e caha tabata sera caba. Recherchenan di Atraco Team a bay na ambos Snacktruck y a cuminsa cu un investigacion

E atracadonan tabata un mucha homber hoben Chines y dos otro mucha homber local, bruin cla, nan tur tres ta papia bon Papiamento. Polis ya caba tin un pista ken e atracadornan aki ta. Varios unidad di Polis y Team di Recherche ta riba caya buscando e tres hobennan aki, nan ta parando varios auto y ta haciendo controlnan rigoroso. Por spera den un momento pa otro, cu nan lo por pone man riba e tres hobennan aki.

Ken cu a wak algo of sa  algo yama e tiplijn di Polis cu ta 11141. Ta hunto nos por combati criminalidad na Aruba.