Artistanan local a pone ambiente cu Urban Lockdown na Divina Bar & Terras

Diaranson anochi cu a pasa, tabatin bon musica, bebemento y bon ambiente cu alabes distanciamento social bou di protocol di DVG na Divina Bar & Terras, cerca di Caya Grandi.

Tur hende tabata sinta na mesa ta papia y gosa c’e musica, cu bromernan deportivo di luho staciona ta dorna e patio como parti di e tema di anochi: ‘BikeLife’. Oz, e host di anochi y doño di e bar, a organisa e evento di ‘Urban Lockdown’ unda cu tabatin artistanan local – entre otro Man$el, Willo Man, Cody Rast y Rapi – cu a haci un show p’e publico presente.

E artistanan aki ta scirbi tur nan propio canticanan, sea ta trap, drill, dancehall, reggaeton of dembow, nan ta demostra un abilidad pa domina varios genero. Man$el a cuminsa e show cu su single ‘Back Shotz’ cu el a freestyle y flip di un cantica di e difunto Pop Smoke, y algun cantica despues a dedica ‘Peiky Dama’ na su chick Axianthé cu a sinta den stoel dilanti, mientras Man$el tabata canta p’e. Despues el a trece su mama dilanti tambe pa dedic’e su cantica emocional ‘Love Pami Mama’, mientras e publico tabata anima e artista y su mama tabata canta e letranan huntu cu n’e.

Willo Man, Rapi y Cody Rast tur a rap nan letranan riba diferente beat di trap, drill y pa ultimo dembow, cu a set bon ambiente entre tur presente cu canticanan manera ‘Nada No ta Menko’ y ‘Bai Dilanti’. ‘GaserOp’, ‘FREEBARS 3’, ‘Welcome To My Hell’, ‘Nunca Switch’, ta par’i ehempel di nan canticanan mas conoci cu ‘FREEBARS 3’ na 70 mil views riba YouTube.

Ful e grupo di artista tin bon kimica y coordinacion entre nan tur, cu un artista lidiando e cantica, mientras e otronan ta compliment’e cu adlibs, nunca fuera di tempo.

Por haya Man$el, Cody Rast, Willo Man y Rapi riba Facebook (den ordo di ser menciona) @Man$el Experiencia, @Cody Rast Official, @Willo Man Lts y @Rapii TaKeda Rapii.