Corupcion na Aruba?

“The world is a dangerous place, not because of those who do evil, but because of those who look on and do nothing” (Albert Einstein), asina drs. Ling Wong a cuminsa su articulo, analisando encuesta di Banco Central.

Banco Central di Aruba a organisa diferente encuesta riba e tema di corpucion. Resultado di e ultimo ta mustra cu 75% di respondente nan a contesta afirmativamente.

Na april 2019 a tene un Congreso di Autoridadnan Local y Regional di e Comision Europeo. Un raport a worde presenta cu e titulo: “Fighting nepotism within local and regional authorities”.

Nepotismo t’e practica di politico pa faborece familiar y amigo solamente p’e hecho cu nan ta famia of amigo. E recomendacion den e raport aki por preveni cu Aruba na un cierto  momento ta hayé cu tres Hoofdcommissaris van Politie riba su payroll/presupuesto.

Nepotismo y faboritismo por stroba e efectividad y eficiencia di servicio publico, segun drs. Ling Wong.

E ta rebaha e confiansa publico y daña e percepcion cu Gobierno ta sirbiendo e interes di nan votador nan. Tur esaki nos ta wak na Aruba y a bira parti di bida riba tur nivel na Aruba. A way of life!

Den e articulo aki solamente algun recomendacion ta worde trata. E raport completo por worde download for di internet.

Algun observacion di e raport ta lo siguiente: Pa Gobierno funciona efectivamente e mester di personal hopi motivá y competente. Nombramento y promocion a base di merito ta un pre-condicion pa sigura e imparcialidad y calidad di e servicio publico cu ta worde duna. Na mesun momento e poder di por nombra y kita personal ta worde reconoci como un fuente di riesgo significativo di corupcion.

Gobierno chikito ta specialmente vulnerabel pa nepotismo y otro forma di faboritismo dor di nan escala chikito, nan autonomia y e cercania cu nan ciudadano. Esaki nan tur nos tin na Aruba. Dor di esaki e practicanan aki ta hopi visible. Nan ta daña e confiansa di e publico. Esaki ta crucial pa un bon funcionamento di Gobierno.

Nepotismo por descurasha candidato capacitá, motivá y competente pa solicita pa cierto posicion nan. Trahador sin calificacion ta worde nombra. Y asina ta perhudica e funcionamento adecua di Gobierno. Interes personal ta prevalese riba interes publico.

Segun drs. Ling Wong proceso di nombramento mester ta transparente y hiba segun regla y standard etico. Mester preveni influencia inaceptabel di mandatario den procedura di un seleccion, unda conflicto di interes ta existi.

Mester implementa ley nan cu suficiente provision pa mitiga e riesgo di nepotismo. Y tambe pa combati y deal cu e caso nan sospechoso di nepotismo.

Mester establece institucion nan pa monitor e implementacion y efectividad di e ley nan aki. P’esaki mester sigura training profesional di e funcionario publico.

Segun drs. Ling Wong na Hulanda e gemeentenan di Hellevoetsluis y Amsterdam a implementa nan maneho di integridad. Nan a nombra un funcionario specialisa y un oficina di Integridad pa controla asunto nan di integridad den nan gemeente.

Algun tip cu ta worde duna finalmente ta

Adopta un maneho di nombramento y seleccion cu claridad y cu ta encera tur aspecto.

Introduci e custumber pa obliga tur funcionario publico envolvi den un cierto caso di seleccion y nombramento pa firma un declaracion cu nan no tin relacion of conflicto di interes cu e solicitante.

Envolvi un instituto independiente di Gobierno pa controla etica y riesgo.

Un dicho cu nos por aplica riba e resultado di e encuestanan di Banco Central di Aruba ta:

“Un mayoria grandi por ta robes un biaha, pero e no por ta robes tur biaha,” segun drs.Ling Wong.

Segun Albert Einstein nos mester haci nos parti pa haci Aruba un lugar cu menos riesgo y no keda para wak sin haci nada.

Na tur esnan cu a bisa den e encuestanan cu tin corupcion na Aruba, ban tuma accion awor y no keda para wak y no haci nada. Ban haci nos parti! Let’s do it!

Hunto nos lo logré!