Gobierno di Aruba preparando su team negociador

Gobierno di Aruba a ricibi e conseho di Raad van State riba e leynan di Reino di COHO y RAFT diabierna ultimo for di Secretario di Estado, Raymond Knops.

Secretario di Estado, Raymond Knops a ricibi e consehonan un siman prome, pero a haya ta prudente pa no manda nan pa Gobierno di Aruba te ora cu papia cu e Gobiernonan riba posibel procedura pa encamina.

E reunion aki a tuma lugar dia 18 di maart, Dia di Himno y Bandera, hunto cu Premiernan di Corsou y Sint Maarten. Y den e reunion ey a haci palabracionnan tocante e procedura cu lo encamina awor. Consecuentemente a manda e consehonan pa Gobierno di Aruba.

SIGUIENTE PASONAN

Siguientemente lo cuminda deliberacionnan intenso riba e contenido di e Conseho di Raad van State. E deliberacionnan aki lo tuma lugar tras di porta cera, pasobra e reglanan pa cu consehonan di Raad van State ta stipula cu no por publica un conseho di Raad van State te ora cu e ley mes wordo entrega na Parlamento.

Mirando e interes grandi cu ta envolvi, a palabra cu lo pone prioridad n’esaki. Despues cu Conseho di Minister di Reino trata esaki, lo comparti e texto di e ley y e conseho di e paisnan.

RAAD VAN ADVIES

Gobierno di Aruba a ricibi tambe e consehonan di nos Raad van Advies riba e COHO y RAFT, y esakinan lo wordo uza tambe den e negosacionnan proximamente.

TEAM NEGOCIADOR

Gobierno di Aruba ta preparando e team tecnico cu lo negocia hunto cu Corsou, Sint Maarten y Hulanda.