LBHam di Codigo di Proteccion a bira un realidad

Despues di un lucha y trabou hopi intensivo porfin Sociaal Crisis Plan a logra cu e implementacion di Codigo di Proteccion.

Den un periodo di 1 aña di tempo e ekipo di Codigo di Proteccion bou auspicio di Sociaal Crisis Plan a logra prepara y awor lo introduci e maneho y ehecucion di Codigo di Proteccion den sector; Social, Enseñansa, Husticia y Salubridad Publico.

Codigo di Proteccion t’e base fundamental di un sistema di proteccion efectivo y efeciente di nos mucha y hobennan. Codigo di Proteccion ta drenta na vigor pa tur profesional, cu ta traha directo y indirecto cu mucha, hoben y nan famia, ora nan tin (sospecho di) abuso di menor.

Codigo di Proteccion ta structura e proceso di evalua (sospecho) di abuso di mucha, haciendo uzo di 5 paso, cu ta describi den e LBHam. Durante 1 aña desde a duna diferente training di Signs of Safety (SoFS) na mas cu 300 profesional den e 4 sectornan. SofS t’e herment cu e profesionalnan ta uza den e 5 pasonan di Codigo di Proteccion, p’asina por pone e mucha/hoben central y sigur.

Den e proximo simannan lo bay tin training intensivo di un total di 14 persona cu lo bay dedica nan mes como “Train de Trainers”, via LVAK (Landelijk Vakgroep Aandachtfuncionaris Kindermishandeling), di Hulanda. Nan lo ta encarga cu e responsabilidad pa guia y duna curso n’e Supervisornan di Codigo den tur 4 sector y asina garantisa cu e supervisornan ta keda na altura di tur loke ta encera (sospecho di) abuso di mucha y violencia relacional.

Ta premira cu na comienso di april, Codigo di Proteccion lo drenta na vigor. Tras di cortina tin varios trabou intensivo cu a tuma den e sectornan, cu e lidernan di proyecto di cada sector: Dorilis Werleman sector Husticia, Grace Maduro sector Salud, Efraim Suurendonk sector Social y Jullie-Ann Thode y Joan Danies pa sector di Enseñansa, Paul Baeten pa Bureau Sostenemi.

Definitivamente un palabra di pabien n’e tremendo ekipo di Codigo di Proteccion, cu ta traha incansabel pa logra implementa un sistema cu por garantisa y salvaguardia nos mucha- y hobennan, ora ta trata (sospecho di) abuso di menor na Aruba.