No ta permiti pa tin bebida alcoholico riba caminda publico of riba espacio publico pa bebe of tin den bo posecion bebida alcoholico

Ultimo dianan, por a constata cu tin un libertinahe y malcomportacion di nos hendenan. P.e. riba varios parkeerplaats, autonan ta yega, habri baul y nan tin basta bebida alcoholico y ta bebe esaki publicamente.

Den nan afan pa reduci mas contagio di Covid-19, Crisis Team ta informa comunidad cu den e Ministeriele Regeling nobo ta prohibi pa bebe of tin den uno su posecion, bebida alcoholico riba caya, den auto, cant’i caminda of na lama y riba parkeer plaats.

Si bo wordo gara ta viola e ley aki lo tin consecuencia; bo por haya multa y bo vehiculo por wordo tuma den beslag. Crisis Team ta informa tambe cu ta prohibi pa tene actividad social (fiesta) na cas. Taskforce di Crisis Team y Polis ta riba caminda cu extra vigilancia y lo actua ora cu esaki ta necesario. Tambe ta recorda un y tur cu no ta permiti pa ta presente den un parkeerplaats of na beach despues di 7or di anochi.

Bar y restaurantnan mester percura pa cumpli cu tur regla di distanciamento social, cantidad di hende na mesa y cantidad di hende permiti paden y pafor di establecimento. Cada establecimento ta responsabel pa cumpli cu e reglanan den y riba su propiedad.

N’e momento aki cada persona na Aruba mester pensa seriamente ki decision e ta tuma pa evita contrae e virus, Hospital ta relativamente yen y ta yenando y ta algun cama mas tin den e seccion di Intensive Care. Abo cu bo comportacion t’e factornan principal pa evita cu bo ta keda infecta y despues por pega otronan cu e virus, manera bo sernan keri na cas of coleganan di trabao.

Limita bo salimento, cumpli cu e reglanan di higiena, respeta e medidanan, pone bo mes na altura di tur regla y medida vigente bishitando e website www.arubacovid19.org