Rachelle Roos a bira empleado di luna di februari

E di dos biaha na 2021 a toca turno na un empleado y tremendo colega di Facilitair Bedrijf cu tin Hospital na pecho, esta Rachelle Roos. Hunta Directiva y diferente manager di Facilitair Bedrijf conhuntamente cu algun colega a sorprende Rachelle Roos como empleado di luna di februari 2021.

Desde cu Charlissa Chaljub, Manager Hoteldienst a cuminsa traha na hospital, ya caba Rachelle Roos tabat’ey. Na dado momento Rachelle a cuminsa forma parti di Facilitair Bedrijf y nan a cuminsa traha hopi cerca cu otro.

Charlissa a duna di conoce cu Rachelle semper ta cla pa yuda no ta importa dia ni ora. Rachelle ta un hende hopi preciso y pues ta exigi cierto perfeccion, pero semper ta haci su trabou cu hopi smaak y un persona cu tin hospital hopi na pecho.

Milka Wernet, Manager di Seguridad tin algun aña ta traha cu Rachelle Roos den su funcion como management assistent di Facilitair Bedrijf. El a duna di conoce cu Rachelle ta un persona hopi balente y e mes ta tuma e iniciativa pa busca trabou. E ta tuma trabou di diferente departamento cu ta resorta bou di Facilitair Bedrijf entre otro den e parti di beveiliging unda el a asisti hopi den e parti di coach e personal di siguridad.

No ta importa e trabou, Rachelle semper t’ey pa yuda. E mes ta percura pa tur cos cu nan tin mester sin molestia e manager. Rachelle tin sigur un balor agrega inmenso pa nos y nos ta apreci’e hopi.

Pa Rachelle esaki tabata un sorpresa grandi cu el a bira empleado di luna. E tabata bezig cu diferente mudamento cu ta tumando lugar den hospital y na dado momento su hefe a yam’e y bis’e cu e tin di bay haci un trabou casi imposibel.

“E tabata echt un surprise y mi no tabatin idea di nada,” el a duna di conoce.

E ta gusta su trabou di Hospital pasobra e ta hopi dinamico. Tur dia tin algo diferente pa haci. E ta hopi bezig riba e vloer y ta traha cu tur personal di Hospital, sea coleganan riba piso di cuido of coleganan cu ta haci otro tipo di trabou ofreciendo servicio na sea pashent, bishitante of otro colega interno.

“Mi gusta tur cos di e trabou. Tur dia ta algo diferente.” El a duna di conoce cu si un persona kier bin traha den cuido na hospital, bo mester gusta loke bo ta haci, bo mester tin un pasion p’e trabou di cuido.

E ta recorda tur hende cu den cuido bo ta traha cu pashent y famia, cu cosnan delicado y p’esey bo mester tin pasion p’e. Pero e ta conta pa tur otro trabou den Hospital, pasobra bo mester tin e capacidad pa enfrenta loke bo ta haya durante bo trabou. Un dia den Hospital ta  hopi dinamico den tur aspecto.

Masha pabien Rachelle cu e bunita reconocemento aki!