Si Gobierno sigi ignora CBN, e por crea un situacion serio pa pais Aruba

For di momento cu Gobierno Wever-Croes a sinta na aña 2017, por a papia di un conflicto entre Minister di Deporte Dangui Oduber y Raad van Toezicht di Fundacion Lotto pa Deporte. E conflicto aki a bira asina serio cu tabatin diferente caso den Corte cual Fundacion Lotto pa Deporte a gana tur.

Awor e panorama ta mustra cu ta bay tin un conflicto di un magnitud mucho mas grandi entre Gobierno di Aruba y Canadian Bank Note (CBN), cu t’e operador actual di loteria na Aruba usando e licencia di Lotto pa Deporte.

E situacion aki por tin consecuencia serio pa pais Aruba dor di e risico di claim dor di CBN si acaso Parlamento di Aruba aproba e proposicion di Ordenasa di “Kanspel en Kanspel-autoriteiten” pa habri e mercado di loteria aki na Aruba. Esaki lo kita e actual drecho exclusivo di Lotto pa Deporte pa organisa loteria na Aruba.

E Lotto-dossier a bira un risico nacional pa pais Aruba cu ta urgi pa Gobierno Wever-Croes bini cu un solucion rapido y sabi. Hasta e dossier aki di Lotto lo bay para bira un asunto di Reino mirando cu e carta di menasa di CBN a bay tambe pa CAFT (e CFT di Aruba). Ta tristo pa mira cu e dossier aki a pasa nos frontera nacional. Con pais Aruba por sali for di e impase aki cu minimo na daño financiero?

Wel e mihor forma pa contesta e pregunta clave aki ta pa aplica e principionan cu ta para den e buki Chinees di “The Art of War” di Mr. Sun Tzu.

E buki aki ta splica cu e mihor strategia di guera ta: “To win without fighting is the best” (Pa gana sin tin mester di bringa t’e mihor manera). E buki aki ta bisa cu mester pone hopi atencion na “Strategic Assessments”. Esey kier men den e caso di CBN nos ta papiando di un contrapartido cu ta un multinacional financieramente mas poderoso cu pais Aruba. Esey ta nifica “when they are strong, avoid them”.

Ta mas sabi pa Gobierno di Aruba start mas liher posibel un renegociacion cu CBN pa cu e management agreement den e Lotto case aki. Ta por medio di dialogo cu CBN mester por yega na e mihor solucion na bienestar di pais Aruba y specialmente pa nos deporte.

Den e dialogo aki mester tene na consideracion “e management agreement” entre Fundacion Lotto pa Deporte y CBN cual ta contene un clausula unda si cumpli cu cierto condicion relata n’e fiansa cu e banco local pa cual CBN a para 100% garantia por tuma despedida di CBN sin mester paga nada (no claim). Ta djies “zeg op” e “management agreement” manera ta stipula den e deal.

Pa logra e strategia aki si, ta imperativo y necesario cu Fundacion Lotto tin un otro Raad van Toezicht y gerencia nobo na bienestar di pais Aruba y e fundacion mes cu ta di Gobierno.

Tin un dicho: “Haci bo enemigo bira bo mihor amigo t’e mihor solucion pa un conflicto.”

Lamentabelmente p’e Raad van Toezicht arogante di Lotto pa Deporte ta conta e quote di Mr. Thomas Paine: “To argue with a person who has renounced the use of reason is like administering medicine to the dead”.

Mester tene na consideracion cu tin 5 sentencia den e conflicto entre Fundacion Lotto pa Deporte y Gobierno di Aruba. Tur e 5 sentencianan no ta na fabor di Gobierno. Pregunta clave ta kico mester pasa anto? Un biaha mas e buki di “The Art of War” ta bisa haci un “strategic assessments” ta hopi esencial. Wel den e caso di Fundacion Lotto pa Deport si no ta conta (mas) “when they are strong, avoid them”.

Un analisis strategico di Lotto pa Deporte ta mustra un fundacion financieramente debil cu hendenan den Raad van Toezicht di 4 incompetente, sin capacidad, sin balor etico y hopi inconfiabel.

For di 2019 financieramente a crea debenan nobo pa Lotto pa Deporte. Na luna di juli 2021 Lotto pa Deporte mester paga bek e segundo quota di e fiansa cu Gobierno di mas cu un miyon florin. Banda di esey tin retraso miyonario den pago di subsidio pa cu deporte na Stichting Sportsubsidie Aruba.

Hasta tin informacion den circulacion cu Lotto pa Deporte a haci (extra) debe considerabel na un banco local y cu hasta ta purba pa hinca e debe nobo aki den e fiansa origina na 2011.

Ta papia tambe cu supuestamente lo tin apoyo di CBN via un posibel “tweede hypotheek” riba e compleho deportivonan cu Lotto a haya for di Gobierno di Aruba (mihor bisa pueblo di Aruba). Esaki mester wordo confirma dor di un investigacion independiente pa verifica kico precies ta berdad. Si esaki ta berdad e intencion aki ta stroba di por aplica aworaki e clausula di “opzegging” di e management agreement cu CBN.

Ta usando “tricks” pa evita posibel violacion di Statuto 2017 di Fundacion Lotto pa Deporte, pero den esencia cual kier cambio den e condicionnan di un fiansa existente o seramento di un fiansa nobo mester ta autorisa dor di Minister di Deporte manera cu ta stipula den e Statuto 2017. Si no tin autorisacion esaki kier men un violacion serio di Statuto 2017 cu por tin resultado legal pa tur esun nan envolvi, kizas te hasta haci nan personalmente responsabel.

Banco local “Ojo” cu e Raad van Toezicht y Gerencia di Lotto pa Deporte pa posibel violacion di Statuto 2017. Mañan nos di AWEMainta lo bin cu mas di e caso aki.