Tira Chana pa gara Juanita

Dos siman pasa, Raad van State a emiti su conseho riba e ley di Reino, relaciona cu establecimento di COHO, entidad cu ta bin supervise y hasta maneha e situacion financiero di e islanan Caribe Hulandes.

Fraccion di AVP for di comienso di e asunto aki, a insisti cu loke Gabinete Wever Croes ta haciendo, no ta corecto y cu Gobierno ta entregando autonomia financiero di e pais sin bringa pa esaki.

E decision di Raad van State ta algo confidencial, pero el a lek formalmente e siman aki loke no a cay na agrado di Secretario di Estado, Raymond Knops y tin cu mira kico e consecuencianan di esaki lo ta y ta kende lo a laga e decision aki los.

Sorpresa grandi tabata declaracion di Prome Minister Evelyn Wever Croes, kende a reacciona mesora y bin dilanti y informa cu Gabinete Wever Croes ta preparando un ekipo pa bay renogocia cu Gobierno di Reino.

Un declaracion cu ta sorprende hopi hende ya cu tur e tempo cu a spera cu Evelyn como Prome Minister di e pais aki lo a hinca un negocacion mucho mas fuerto y mas dirigi, a dicidi di forma practicamente tur acuerdo cu Hulanda a pone riba mesa.

Aki Prome Minister no por bin papia cu e crisis di pandemia a pone cu su persona mester a core firma pa haya ayudo financiero ya cu ta for di luna di november di 2018, Prome Minister Wever Croes y Minister di Finansa Xiomara Maduro, a firma un protocol cu Hulanda den cual ta bay di acuerdo pa tuma medidanan drastico.

E situacion a empeora ainda mas na 2019 ora cu Prome Minister cu a sigura Hulanda cu e lo bin bek Aruba y pidi Parlamento di Aruba atende y aproba e ley di CAFT, a bin hunga un wega politico sin sentido, apoyando e posicion di su tres fraccionnan den Parlamento cu a purba di by-pass CFT, loke a pone cu Hulanda a forsa Evelyn pa no firma e ley aki loke te dia di awe e no a haci.

Hasta tin indicacion cu Hulanda lo a obliga Minister Presidente Evelyn Wever Croes, di destrui e ley aki pa evita cu e lo por lanta cabes mas despues, pero ta for di e tempo ey, Evelyn ta hibando un lucha cu Hulanda, cu ningun hende a compronde.

Es mas, e lucha di Evelyn pa pone finansa di pais Aruba a cuminsa for di tempo cu Plasterk tabata Secretario di Estado pa Asunto di Reino, caminda el a biaha hunto cu Xiomaro Maduro pa Den Haag caminda el a parti copia di un raport cu MEP a traha caminda el a pidi pa Plasterk y Gobierno Hulandes, interveni y tuma medida contra di AVP, cu segun e titulo di e raport a mustra: “Feestvierend ten ondergaan.”

For di e tempo ey Evelyn ta hibando un lucha cu Hulanda cu ningun hende a compronde y aña pasa como Minister Presidente el a dicidi di bira lomba pa su partnernan di Corsou y Sint Maarten, na lugar di forsa un union, caminda el a bula bay Hulanda sin sikiera informa Parlamento di su biahe.

Aya na Den Haag el a firma e acuerdo cu Gobierno di Reino pa acepta tur cos cu wordo poni riba mesa, entregando autonomia financiero y creando un situacion sumamente delicado p’e pais.

Awe e mesun Evelyn Wever Croes aki ta bin dilanti y bisando cu su Gobierno ta trahando riba un ekipo pa bay renegocia cu Hulanda, sin sikiera a hiba un discusion cu otro partnernan den Reino of cu Hulanda mes.

Esaki ta locual e dicho di nos grandinan ta bisa, esta cu Prome Minister Evelyn ta “tirando Chana pa gara Juanita,” pues djis haci algo pa haci sin sa kico e tin cu haci den un situacion asina serio y delicado.