Aruba ta hunga wega di clasificacion pa mundial di futbol

Recientemente Arubaanse Voetbal Bond (AVB) a confirma su participacion den e weganan eliminatorio di Campeonato Mundial di Futbol Qatar 2022, cu ta tuma lugar na Tampa, USA. A prepara un ekipo nacional, cu e mihornan di nos isla den futbol.

Lamentablemente, net prome cu biaha pa Merca pa enfrenta Surnam, a presenta e realidad cu 2 hungador a test positivo pa Covid-19.

Consecuentemente, a haci test cu tur otro hungador, pa garantisa cu tur otro ta test negativo pa por biaha. Hunto cu DVG a sigura cu tur hungador a haci test pa por biaha sin problema y representa cara di Aruba internacionalmente. Tur otro hungador, den e seleccion nacional, a test caba y tur ta negativo.

Mester menciona cu e entrenador a percura pa simannan largo di training intensivo. Meta tabata pa alcansa un nivel di calidad di hungadornan, pa por enfrenta Surinam. E schedule di entrenamiento a bay segun reglanan estricto di DVG.

Mester menciona cu e medidanan di prevencion pa evita plamamento di e virus na Aruba a compromete e programa di entrenamiento bastante, pero asina mes e hungadornan a duna tur di nan banda pa sigui entrena, pa por ta den top condicion pa enfrenta e Surnameonan dentro di poco.

AVB ta convenci cu e esfuerso y dedicacion di tur e hungadornan y e staff tecnico lo duna bon resultado den e wega cu ta tuma lugar na Bradenton, Sarasota, na Merca.