Despues di tuma nota di e carta di CBN pa Parlamento, ta surgi e pregunta, kico mester pasa awor?

Ayera AWEMainta a publica cu si Gobierno sigi ignora CBN, e por crea un situacion serio pa pais Aruba. Pasobra for di momento cu Gobierno Wever-Croes a sinta na aña 2017, por a papia di un conflicto entre Minister di Deporte Dangui Oduber y Raad van Toezicht di Fundacion Lotto pa Deporte. E conflicto aki a bira asina serio cu tabatin diferente caso den Corte cual Fundacion Lotto pa Deporte a gana tur.

Awor e panorama ta mustra cu ta bay tin un conflicto di un magnitud mucho mas grandi entre Gobierno di Aruba y Canadian Bank Note (CBN), cu t’e operador actual di loteria na Aruba usando e licencia di Lotto pa Deporte.

E situacion aki por tin consecuencia serio pa pais Aruba dor di e risico di claim dor di CBN si acaso Parlamento di Aruba aproba e proposicion di Ordenasa di “Kanspel en Kanspel-autoriteiten” pa habri e mercado di loteria aki na Aruba. Esaki lo kita e actual drecho exclusivo di Lotto pa Deporte pa organisa loteria na Aruba.

Di e 5 sentencianan esun cu aworaki ta conta t’e bodem di 24 juli 2019 (AUA 201800634). Den e sentencia di apelacion (Hof) di 30 juli 2019 (AUA2018H00030) e contenido di e bodem a keda confirma dor di 3 Huez.

Ta berdad cu finalmente Lotto pa Deporte a gana diferente bataya contra Gobierno di Aruba, pero no e guera.

Den e sentencia di bodem aki Huez a laga un “loophole” pa Gobierno di Aruba estilo “Achilles Hiel” cu ta para den paragraaf 4.24 riba paginanan 17 y 18. Esaki kier men cu Minister di Deporte como organo di Statuto 2017 mester por haci pregunta y pidi informacion n’e Raad van Toezicht di Lotto pa evalua nan funcionamento.

Ta importante pa bisa cu for dia cu Gobierno actual a sinta te aworaki por papia di suficiente tempo pa por forma un opinion solido, valido y husto pa cu funcionamente di cada miembro individual y colectivo di e Raad van Toezicht di Lotto.

Posibel argumentonan pa exit mester wordu busca den e sigiuente areanan di funcionamento:

1-Por papia di un bon maneho general, Good Corporate Governance?

2-Por papia di un bon maneho financiero?

3-Por papia di cumplimento di Statuto?

4-Por papia di cumplimento di nos leynan vigente: Empresa, labor, impuesto etc?

5-Por papia di cumplimento di contractonan existente?

6-Por papia di cumplimento cu e condicionnan di e licencia di loteria?

7-Por papia di cumplimento di sentencianan di Corte?

8-Por papia di conflicto di interes dor cu e mesun hendenan den e Raad van Toezicht di Lotto aki mester controla y aproba cuentanan anual (jaarrekeningnan) tempo cu nan tabata den Raad van Bestuur di Lotto?

9-Por papia di un relacion sano di confiansa entre e Raad van Toezicht di Lotto y Gobierno di Aruba, mihor bisa e Minister di Deporte?

10-Por papia di integridad intachabel serca e miembro di Raad van Toezicht di Lotto?

Si e preguntanan su contestanan ta negative, anto tin motibonan valido pa “exit” e hendenan aki awor mes, usando abogadonan y un bon dossier. E dicho final ta “A quien te trate como un juego ensénale como se juega”. Gobierno di Aruba mustra‘political leadership and don’t give in’. Core cu e hendenan golos (hebzucht) aki di Raad van Toezicht y gerencia di Fundacion Lotto pa Deporte. Ta manera Lotto pa Deporte a para bira un Gobierno den Gobierno minando asina nos estado di derecho democratico.