Exposicion “den aire liber” di Archivo Nacional Aruba

Den cuadro di e celebracion di nos 45 aña di Himno y Bandera dia 18 di maart ultimo, Archivo Nacional Aruba conhuntamente cu Fundacion Amigonan di Archivo y sosten financiero di Unoca a pone un exposicion diferente p’e comunidad di Aruba. Un exposicion “den aire liber”.

Contrario n’e añanan anterior unda Archivo Nacional Aruba a organisa y prepara un bunita exposicion p’e celebracion di Himno y Bandera, aña pasa y e aña aki, mirando e situacion actual di Covid-19, esaki no por a tuma lugar.

Pero pa no laga e celebracion grandi aki bay sin mas, ANA conhuntamente cu Fundacion ADA y cu financiamento parcial di Unoca a logra un exposicion den aire liber. E exposicion su enfoke ta “e simbolonan nacional di Aruba”, asina recordando e comunidad di Aruba nan importancia y nan nificacion pa nos pasado y nos futuro.

Riba e middenberm, dilanti e edificio di ANA entre e rotondenan di Airport y FCCA a pone un exposicion di panel cu potret ilustrando e simbolonan di nos Escudo y Bandera. Trafico cu ta bay direccion di e rotonde di e Aeropuerto lo topa cu e nificacion di nos Escudo y trafico cu ta bay direccion di e rotonde banda di FCCA lo topa cu e nificacion di nos Bandera.

Riba cada panel por medio di potretnan historico y contemporario a ilustra e nificacion di un parti di e simbolo nacional y dune un splicacion den forma ilustrativo. Den e prome cuartel di nos Escudo, “E Aloë” tin 4 potret grandi cu ta ilustra e industrianan cu Aruba a conoce den pasado. Mesun cos tambe ta ilustra e nificacion cu potret di e cuartelnan di e “Cero di Hooiberg”, “Dunamento di man” y e “Wiel”.

E metodo di usa potret pa ilustra e nificacion tambe ta wordo aplica pa ilustra e diferente nificacion di e partinan di nos bandera. E color blauw, e liñanan horizontal geel, e strea cora cu su rand blanco.

Ademas di esaki, a pone riba e edificio di ANA un exposicion relaciona cu nos Himno y Bandera. Riba diferente banners y potret por haya sa mas di e historia di Aruba, cu potretnan actual y di antaño.

Archivo Nacional Aruba ta invita e comunidad pa pasa bishita e exposicion riba su edificio y ora den trafico si por admira e panelnan riba caminda. Esaki lo keda te cu fin luna! Un danki ta bay na Fundacion ADA y Unoca den realisacion di e proyecto aki.