Famia di seis durmiendo tur den sala pa falta di electricidad

Pandemia a dal hopi hende duro tur rond mundo, pero aki na Aruba tambe tin casonan realmente tristo y cu ta di preocupacion, sigur mirando cu falta d placa, falta di trabou, ta afectando bida di hopi hende diariamente.

Un famia di seis persona na Santa Cruz, ta bibando solamente di un areglo di FASE cu posiblemente nan lo por perde tambe, pero e situacion a afecta nan asina hopi, cu pa algun luna caba, a converti sala di e cas den un kamber den cual henter e famia ta drumi.

Esaki pa motibo cu no por sigui carga e gasto di coriente y ta limitando uso di coriente den oranan di anochi y pa no usa varios fan den diferente kamber, a dicidi di drumi hunto den sala caminda ta usa un solo fan y tambe ventilacion natural, esta drumi cu algun bentana habri.

“E ta dificil, e ta fastioso ya cu e muchanan no tin nan privacidad y nos como mayornan tampoco tin esaki y ta bin acerca cu placa no ta yega pa cumpra mucho cos, manera e.o. fliet contra di sangura, loke ta pone cu tur hende ta lanta cu pica di sanger na henter curpa.

E famia cu tabata gosa di un entrada di casi 4 mil pa luna cu ambos mayor trahando, awor tin cu biba s’un suma di algo mas cu 900 florin pa luna, cu ta yega pa cubri gastonan di cas, pero caminda tin duna cu no tin mucho placa pa un bon cuminda.

Muchanan ta bayendo scol cu hopi iregularidad, pero ta yuda tin ora pa haya algo di entrada dor di chapi cura di bisiñanan of cualkier otro job cu nan por piki, pero te ainda nos ta logra y hunto nos lo sali di e situacion aki, pero e no mester dura mucho mas.

Tambe mi casa y ami ta trahando na hotelnan, pues caminda nos ta traha ainda nan no a habri porta y nos ta sin entrada y placa cu nos a yega di spaar, practicamente a caba ya cu ta for di esey nos tabata biba cune pa algun luna.

Desde luna di december nos situacion a bira mas precario, pero tog nos ta ricibi ayudo di famianan yega na nos, cu ta compronde nos situacion y nan ta yuda, ya cu lanta 4 yiu den e situacion aki, no ta algo facil,” e ciudadano aki a splica na AWEMainta.

No t’e famia aki so, pero tin cantidad di otro famia tambe pasando den momentonan dificil desde cu pandemia a dal nos isla na maart di 2019 y no solamente ta enfrentando problemanan financiero serio, pero tambe di salud pa falta di cuido adecuado cu dor di Covid-19, ta birando mas dificil pa wordo trata na debido tempo.

Varios cas rond Aruba ta pasa algun dia sin coriente te ora cu nan logra di haci un job aki y aya pa por gana algo extra pa cubri e cuenta di tur luna, mientras cu no tin mucho perspectiva di parti di Gobierno pa yuda e hendenan aki.

Ta existi hopi temor cerca hopi famia con nan lo tin cu atende cu debenan atrasa ora cu e pandemia aki wordo controla ya cu tin tambe huurnan di cas cu ta atrasa, debenan na banco cu tin atraso, autonan cu no tin seguro y  otro tipo di debenan cu nan no por cumpli cu nan por lo pronto.

Mientras cu e debedonan tin comprension por spera cu asina e situacion normalisa e hendenan aki lo bin pa nan placa y lo kier mira e pagonan cuminsa mas pronto posibel y lo ta otro problema grandi pa atende cu esaki.

Sector turistico ta dunando un tiki señal positivo a pesar cu no ta spera cu e lo normalisa manera antes mesora, pero tin indicacion cu e sector aki ta sigui crece den ultimo luna y simannan, pero ainda e no t’e solucion financiero p’esnan cu ta depende di e desaroyonan aki.