Gobierno y Parlamento kier asumi atrobe e rol di superman despues di e “conseho” di Raad van State

Diamars mainta Aruba a wordo confronta cu e noticia cu Raad van State (RvS) a emiti su “conseho” riba e proposicion di e Minister di Binnenlandse Zaken Hulandes pa locual ta trata e “consensus- Rijkswet”

COHO.

A surgi di inmediato diferente reaccion, hasta por bisa di hubilo pa dos motibo. Na prome lugar e “conseho” di RvS parce a crea cierto speransa cu awor lo por tin e posibilidad pa trece cambionan ainda den e “Rijkswet” como tambe e “Landspakket”.

Di otro banda p’esnan cu descaradamente a entrega nos autonomia, e “conseho” lo por ta un forma pa salba cara awor dilanti di eleccion.

Ta conoci cu UPP for di un principio a rechasa e forma dictatorial cu e Gobierno di Reino a pasa e “Rijkswet” dor di nos strot, pero igualmente UPP a cuestiona e forma cu sra. Evelina Wever-Croes a hiba e negociacionnan. Cu apoyo di Parlamento a hiba un negociacion sumamente debil y entreguista. A envolvi supuestamente gremio y partidonan politico cu e excusa di lo tene cuenta cu nan opinion den e decision final. Esaki a resulta di ta simpelmente “windowdressing” , pasobra e decision ya caba tabata tuma.

Historia lo mustra cu Gobierno y Parlamento a sucumbi masha liher p’e presion Hulandes pa falta di UNION, corahe politico, preparacion debido y di e forma aki tambe a permiti Hulanda humiya nos pueblo cu entrega di nos autonomia.

E preguntanan cu ta surgi awor ta si sra. Wever-Croes lo por representa interes di nos pueblo debidamente despues di a faya barbaramente durante e prome negociacion. Ta importante pa sa kico exactamente e “conseho” di RvS ta encera, pasobra ya caba tin sospecho cu e “conseho” lo conduci na un diferencia di “interpretacion” entre Gobierno di Reino y e Gobiernonan di e Islanan.

UPP ta di opinion cu e Statuut ta duna cierto indicacion con e lasonan entre e partnernan di Reino mester wordo interpreta, pero na final di cuenta historia a mustra cu t’e opinion di e partner mas poderoso Hulanda ta loke ta conta.

Esey a wordo specificamente exponi dor di ex-Premier Jan Peter Balkenende ora cu el a declara cu RvS ta duna un “conseho”, pero t’e Gobierno di Reino, pues Hulanda, t’esun cu ta dicidi.

Tin mas pregunta cu ta exigi contesta despues di cu e “conseho” a bira publico. Na prome lugar e negociacion lo bay encera solamente e “Rijkswet” of lo inclui tambe e “Landspakket”? UPP ta duda cu e “conseho” di RvS lo bay habri caminda pa papia riba e condicionnan stipula den e “Landspakket”, pasobra RvS a declara di ta completamente di acuerdo cu e condicionnan. E unico opcion lo bay t’e ora evalua e “Rijkswet” y si enberdad e ta enpugna di loke ta para den Statuut. Aki ta na unda e rabo di e porco lo bay krul, pasobra no ta interpretacion di e letranan den Statuut lo bay t’e topico di discusion, pero si e Gobierno Hulandes tin suficiente confiansa den palabracion cu ta haci cu Aruba of no.

Hulanda na diferente ocacion a laga sa di NO tin confiansa den e forma cu Gobierno ta atende cu maneho di e pais p’e ultimo diez añanan. E desconfiansa a bira pio despues di cu sres. Ady Thijssen y Rocco Tjon, apoya pa nos Prome-Minister, a kere di por hunga wega di “SUPERMAN” ora cu  kier a trece cambio den e LAft. Aki ta na unda Gobierno Hulandes a “trek een streep” y a declara di lo kier bin cu extra control si dicidi pa duna Aruba un fiansa. Raymond Knops ya caba na diferente ocacion a menasa hasta di lo para e fiansa si encaso e paisnan no cumpli.

Sr. Tjon y sra. Wever-Croes mester compronde cu e disfras di “superman” a faya den pasado y no lo impresiona Hulanda pa nada, alcontrario e lo duna mas motibo pa keda para firme riba e acuerdo. Pa trata na logra un debate cu posibilidad pa cambio, mester busca apoyo prome aki na Aruba den forma di un Compromiso Nacional sincero y transparente, unda ta delinea e deseo y postura Arubano. Igualmente ta necesario pa Aruba demostra promé di ta serio den ehecucion di cambionan fundamental dor di introduci awor reglanan estricto di bon gobernacion y rechasa faboritisimo y corupcion. Usa e mesun tactica anterior dor di haci comosifuera tin oido pa opinion y preocupacion di gremionan y partidonan, na final di cuenta lo hiba nos n’e mesun resultado, esta complace cu Hulanda y atrobe pone nos pueblo na rudia y cana “coho”!

P’esey UPP ta di opinion cu sra. Wever-Croes no por tin e pretencion ni credibilidad ni e legitimidad di pensa di por negocia pa nos pais. UPP atrobe ta propone pa yega na un Compromiso Nacional a base di un encuentro nacional. Historia a mustra cu UNION  y presentacion di un Proposicion Nacional lo por tin mihor posibilidad di exito.