Kousa Promé ta sugeri pa Pik Pisas hiba Hulanda Korte di NNUU

WILLEMSTAD – Kousa Promé ta rekomendá Gobièrnu Pik Pisas pa no aseptá COHO i pa bai mas leu i denunsiá Hulanda na Nashonnan Uní i hiba nan “International Court of Justice”.

Akusá nan di ta violá Karta Magno i di a blòkia Kòrsou finansieramente bou di preshon p’e sukumbí i aseptá COHO.

Hulanda konsientemente a blòkia Kòrsou i a kita su poder outónomo pa fia plaka riba merkado lokal i merkado internashonal pa hiba su propio maneho finansiero i ekonómiko.

E blokeo ta enserá ku Kòrsou por fia plaka unikamente serka Hulanda i niun otro kaminda mas. Ni lokal ni internashonal. Esaki ta un maniobra diabóliko di e estado pirata Hulanda. Maniobranan di Hulanda huntu ku PAR i MAN pa gana Kòrsou riba rudia i pa kaba di poderá di Kòrsou su rikesanan i su posishon geopolítiko stratégiko aki den Caribe. Kòrsou komo trampolín pa komèrsio Hulandes spesialmente den horeca, aviashon, narkotráfiko i gambling digital.

A resta nos e úniko posishon korekto pa eksigí Hulanda pa respetá lei i tratadonan internashonal i pa kita man for di outonomia di Kòrsou.

Pa solushoná e problema di pobresa i desempleo Kousa Promé ta rekomendá Gobièrnu Pisas pa emití bono riba merkado lokal pa yega na fondo propio pa salba Kòrsou.

A yega e momento pa Kòrsou demostrá ku e por para korupshon i kambia rumbo p’e salba su mes. Awor ta n’e Gobièrnu nobo di señor Gilmar Pisas pa sali dilanti pa Kòrsou a base di patriotismo. Amor real pa Kòrsou i e yiu di Kòrsou. E úniko lucha ku bo por pèrdè t’esun ku bo bandoná. Kousa Promé t’ei pa keda.