Tur hende tin cu tuma precaucion p’e posibilidad di por wordo atraca

Loke tabata di spera a bin ta tumando lugar y tin e posibidad cu e cantidad di crimennan, lo bay conoce un aumento sin precedente den proximo lunanan.

E siman aki dos hoben a dicidi di atraca dos snack truck, caminda no a bay cu mucho placa, pero cu sin duda ta causando consternacion grandi den comunidad.

E falta di trabou, e falta di entrada ta pone cu tin tiponan cu kier yega na placa facil y atraco ta un di e formanan cu nan por yega na placa facil loke ta splica e aumento di e casonan aki.

Notabel ta cu ora cu a detene algun persona sospecha di e comete atraco riba dos truck di cuminda, t’e aparencia hoben di e atracadornan aki, loke tambe ta di hopi preocupacion.

Mientras cu Minister di Husticia, Andin Bikker a bin dilanti den e dianan aki mustrando su orguyo cu Polisnan a logra di haya uniform nobo, na ningun momento el a atende e preocupacion grandi cu tin den pueblo, p’e aumento di casonan di atraco.

Ta bisto cu e antisocialnan aki den varios caso ta duna indicacion cu nan ta studia y a scoge pa comete atraco riba varios lugar cual ta pone cu e momento a yega pa comerciantenan mes cuminsa busca un forma con nan ta limita di tin demasiado placa cash riba nan.

Den e caso di un ciudadano Chines, kende siman pasa a wordo atraca y bandona cu hopi sla na curpa, tambe ta un indicacion cu e anti socialnan aki tabata na altura cu e homber aki lo ta transportando placa y a sigui su tras buscando e mihor momento pa comete e fechoria ki.

Mester inventa un sistema cu ta pone cu e atracadornan no ta mucho comodo y no sa cuanto placa nan lo por haya usando arma di candela y otro intimidacionnan.

Minister di Husticia no ta reaccionando riba e casonan aki, no ta buscando un formula di un maneho caminda lo por reduci e tipo di abusonan aki a pesar cu for di tempo di campaña, Bikker a sigura pueblo cu e lo percura pa reduccion barbaro di criminalidad aki na Aruba,

Fuera di esaki el a priminti di lo introduci camaranan di seguridad den tur bario cu a bira otro di e tantisimo promesanan cu Gabinete Wever Croes no a cumpli cu nan pa cu pueblo.

E ultimo dos casonan di atraco tira trucknan di cuminda a duna e impresion cu e tiponan a warda algo prome cu toque de queda lo a drenta na vigor p’asina comete nan actonan, sabiendo cu no tin hende hende riba caminda e orario ey.

Por anticipa cu e tipo di casonan aki lo aumenta den proximo lunanan y ta di spera tambe cu autoridadnan policial lo por pone man riba e hendenan aki cada bes cu nan abusa di otronan.

Pa colmo no ta solamente negoshinan ta target ultimo tempo por tin casonan cu nan ta bay cas di hende pa busca placa pa horta, violando trankilidad di casnan rond Aruba y aki ta otro indicacion cu ora cu esaki sosode, ta hendenan cu ta na altura di un of otro cos, hasta cu e victima lo tin placa warda na cas.

Pues aki tambe ban sera porta bon, no laga cas habri den oranan laat di anochi  mirando cu e tipo di hendenan aki lo ta coriendo rond y buscando hende pa atraca.