Asociacion di Empleado cu Contrato Laboral Individual den Servicio di WEB Aruba N.V. lo apela e veredicto di Huez di dia 10 di maart 2021 ultimo

Den e caso cu Sindicto SIWA a entama contra di WEB Aruba N.V., Huez no a duna nan razon. Pero como den e caso aki tambe e asociacion, VWI tambe a participa, VWI a dicidi di apela. N’e mesun momento VWI lo entama un bodemprocedure pa investiga profundamente e hecho y condicionnan legal specifico relata cu e cortamento unilateralmente di salario y condicionnan secundario di empleadonan di WEB.

VWI, despues di a consulta estrechamente cu su consehero legal riba e veredicto di Hues di 10 di maart 2021, no ta di acuerdo cu e veredicto di Hues y ta di opinion cu e veredicto aki no tin un base legal pa sostene. Pesey

e miembronan di VWI a vocifera masalmente nan resolucion pa medio di votacion, pa apela e veredicto di 10 di maart 2021 den Hoger Beroep y tambe pa bay den hopi mas profundidad pa cu e detayenan legal di e caso aki pa medio di un bodemprocedure.

VWI ta di opinion cu e Hues di e caso sumario entre VWI y WEB teni riba 11 di februari 2021, a duna un veredicto den cua e ta practicamente “laba man” y a “dump” su decision di e caso den e ‘pos sin fondo y indefini’ di e concepto di ‘interes general’, lagando tur consideracion di e derechonan mandatorio (bindend recht) cu ta cubri legalmente e contrato laboral cu e empleado tin cu su dunador di trabou, esta WEB, un

banda.

VWI ta considera e veredicto di e caso sumario entre VWI y WEB uno insolito y hopi precupante pa cu e integridad y consistencia di e estado di derecho cual Aruba supuestamente ta. VWI ta reitera un biaha mas cu VWI ta reconoce cu Pais Aruba ta den un situacion financiero hopi precario.

VWI kier yuda y contribui cu su ‘granito de arena’ pa por alivia otro personanan cu a perde nan trabou y/of ta pasando den momentonan financieramente dificil. No laga tin ningun duda den esey.

Sinembargo, loke VWI ta trece den disputa t’e manera, den VWI su opinion, ilegal y dictatorial cu Gobierno di Aruba, Utilities Aruba N.V. y WEB kier impone e cortamento di salario riba e empleado di WEB.

Gobierno di Aruba tin su leynan cu e mester cana pa por exigi unilateralmente entrega di propiedad di ciudadanonan priva (cual salario y condicionnan secundario ta propiedad di e ciudadano) bou di e motivacion cu e entrega di salario ta necesario pa cu ‘interes general’.

Ta evidente cu Gobierno di Aruba no a respeta e leynan aki y a scoge pa cana un caminda di impone y

dicta como accionista di Utilities Aruba N.V. y, pues indirectamente, di WEB Aruba N.V. tambe, bou

di e presumptuo excusa di ta exigencia y condicionnan di Hulanda pa haña asistencia pa cu fondo di

likides.

Hulanda por wel a pone condicionnan pa cual Gobierno di Aruba mester cumpli cu ne pa por haña e asistencia di likides, pero Hulanda no a bisa Gobierno di Aruba pa bay haci esaki na un manera contra ley.

Por ultimo, VWI, despues di a consulta cu su consehero legal, ta di opinion cu e veredicto di 10 di maart 2021 di e caso sumario entre VWI y WEB no por keda asina manera cu e ta. E veredicto aki, si lage asina y e bira un hurisprudencia legal oficial, ta trece un peligro cu ne p’e derechonan di henter e clase trahador di pueblo di Aruba.

E veredicto di Hues den cual e Hues ta supuestamente hustifica e uso di ‘interes general’ como base pa bari tur otro leynan mandatorio for di mesa, sin sondia y investiga den mas profundidad ki consecuensia of base legal por tin pa haci esaki, ta un veredicto cu VWI ta considera preocupante y hasta peligroso.

‘Interes general’ no ta un instrumento pa Gobierno di Aruba haci loke e kier den momentonan dificil, of pa un Hues “laba man” di un caso compleho cu un veredicto cu, den VWI su opinion, ta basa su mes riba argumentonan hopi suak y sin base legal, segun Directiva General di VWI.