Bikker a warda te fin di gobernacion pa ehecuta proyectonan cu tabata cla y na beneficio di husticia dor di AVP

Locual cu ta tumando lugar den ultimo rosea di gobernacion ta un alivio p’e dienstnan, pero lamentablemente un periodo perdi cu por a haci bon uzo di cada material y mehoracion den maneho. Tur esaki si acaso a continua cu ehecucion for comienso, na momento cu a laganan cla dor di e Minister anterior, Robert Candelaria di AVP a duna di conoce.

Den ultimo siman por a tuma nota cu Minister Andin Bikker a cuminsa ehecuta cambio y proyectonan cu a laga cla p’e dor di ex-Minister di Husticia Arthur Dowers. E legado cu tanto el a mal papia, a resulta e salba bida di su maneho na final, mustranto asina cu locual el a trece cu ne nunca a resulta den nada.

Parlamentario pa fraccion di AVP, sr. Robert Candelaria a mustra  den reciente conferencia di prensa cu ya caba a bisa cu Minister Bikker mester stop di papia di loke el a hereda, pero cuminsa papia di loke su persona cu su maneho lo laga atras, esta su propio ‘legacy.’

Logronan recien cu por menciona ta: Uniform nobo pa Polis y Guarda Nos Costa. Cu ta algo cu tabata regla caba for di aña 2016 p’e Minister di Husticia e tempo ey, Arthur Dowers.

Den e mesun lista di logro aki tambe tin e ‘crashtruck’ cu ta material adicional cu tabata regla pa Minister Dowers. Tin di menciona tambe autonan pa Polis cu tambe ta di tempo di Gobierno di AVP cu ta riba e lista aki.

Momento cu scucha Minister Bikker papia di independisacion di Migracion, tambe tin cu menciona cu ta for di dia 1 di september di  2017, esaki mester a drenta na vigor p’asina e departamento di Guarda Nos Costa  por a un servicio riba su mes.

E trahadornan aki a wordo perhudica tur e tempo ey pa falta di seriedad y pa falta di vision di e actual Minister di Husticia y aki por bisa cu desaroyo den husticia a drumi 3 aña largo y e desaroyo actual no ta di Minister Andin Bikker tampoco. 

Un cos cu Minister Bikker a bin cune t’e “afgeschreven spuittrucks” cu tabata un donacion di Hulanda, pero na lugar di soluciona e situacion pa Departamento di Bombero, e supuesto logro di Bikker aki, a haci e malconento entre personal di brandweer, ainda mas grandi. 

Sinembargo nos por papia di e unico tipo di logronan di Bikker, cu ta di proyectonan cuestionabel di e Minister di Husticia actual, entre otro e containernan staciona na Huis van Bewaring cu sponsor di su ex partido, caminda a haya pa proporciona, pero cu lo no a cumpli cu e necesidadnan di e institucion.

Tambe Minister Bikker a purba muda Polisnan pa diferente edificio c’un ex Minister di inicialnan O.O. como intermediario, pero cu tampoco a resulta den e mihor plan posibel.

Tin cu menciona tambe contract pa helicopter cu su bufete di abogado como intermediario a hinca den otro y caminda ya den pueblo por mira e malcontento cu tin ora cu e aparato aki yega na un sitio di un crimen, ora cu practicamente tur hende a bay drumi caba. Ningun di e proyectonan aki a logra completamente, pasobra nan a bin na claridad tempran of ex Minister Marisol Lopez Tromp a ‘steek een stokje voor’ y lo a hasta entrega  keho na Landsrecherche riba e maniobranan dudoso aki, Parlamentario Robert Candelaria a mustra.