Compensacion a base di Plan Social AAA/STA evidentemente inhusto!

Esaki ta con cu Huez a categoriza e suma di placa cu Aruba Airport Authority (AAA) a solicita Corte den Prome Instancia di Aruba pa duna su trahadornan pa kendenan disolucion di nan acuerdo laboral a wordo pidi.

E compensacion ta basa riba e Plan Social cual a wordo firma dor di sindicato STA, cu ta un di e sindicatonan cu ta representa e trahadornan na aeropuerto, y gerencia di AAA.

Sindicato FTA, cu ta representa e empleadonan di staff na AAA como tambe un grupo substancial di e trahadornan cu ta cay bou di CAO, tin sentimentonan mixto pa cu resultado di e caso.

FTA den nomber di su miembronan na prome lugar a pidi Huez pa nenga e peticion di AAA p’asina e trahadornan encuestion por mantene nan empleo y entrada, specialmente den e temponan dificil cu nos y isla y mundo henter ta pasando aden. Esaki sinembargo a wordo nenga dor di Corte.

Huez den liñanan grandi a considera cu e decision pa cu e manera cu un empresa ta wordo organiza ta keda prerogativo di gerencia, unda cu ta keda na nan tambe pa determina si mester ahusta por ehempel e cantidad di cuponan di trabou pa por cumpli cu demanda. E hecho cu e fluho di pasahero na aeropuerto a cay drasticamente a consecuencia di e pandemia actual y cu lo tuma un tempo largo prome cu esaki normaliza, ta hustifica un reduccion di personal, segun Huez.

Interesante ta cu pa locual ta trata e instruccion di Minister di Turismo, Dangui Oduber den nomber di Gobierno di Aruba pa para y reevalua e necesidad pa retira empleado na AAA, Huez a considera cu Gobierno a pesar di ta unico accionista, no tin e autoridad pa duna orden na gerencia di e N.V.

Un otro aspecto peculiar di e sentencia, t’e hecho cu den e caso aki Huez a desvia di e liña di maneho cu e propio Corte a bin ta aplica den varios decision recien, unda cu ta determina cu e tipo di peticionnan pa retiro aki preferiblemente mester wordo haci na Departamento di Labor y si haci esaki tog na Corte, e caso lo por wordo wanta p’asina e procedura di Departamento di Labor wordo encamina. Huez den su decision a considera cu ley no ta duna espacio pa duna un instruccion asina.

Finalmente FTA y e empleadonan a haya razon pa cu nan ponencia cu e suma cu AAA a pidi Corte pa duna nan no ta husto. E suma a wordo basa riba e Plan Social cu, a pesar di hopi obhecion di parti di sindicato FTA, tog a wordo firma dor di e otro sindicato (STA) y gerencia di Aeropuerto.

Huez den su decision a bay di acuerdo cu e pakete cu Aeropuerto a pid’e pa duna e grupo aki no ta na su lugar.

Huez a considera cu aplicacion di e Plan Social pa cu e compensacion ta hiba na un “evident onbillijke resultaat” (un resultado evidentemente inhusto) p’e trahadornan aki.

Esaki a haci cu Huez a aumenta tur e paketenan cu entre 30 cu 40%. Como cu Huez a desvia di e compensacion cu AAA a pidi, a base di ley e tin cu duna un plazo pa nan por considera di retira e peticion haci na Corte.

Den caso cu no haci tal e acuerdonan di trabou ta wordo desolvi entrante 9 di april 2020 na cual momento lo mester paga e empleadonan e compensacionnan ahusta manera antes menciona.