Kandela na Landsontvanger ta Krimen kontra Kòrsou!

WILLEMSTAD – E atentado kontra e sede finansiero atministrativo enkargá ku kolekta plaka di belasting pa mantené infrastruktura i servisionan vital di nos pais ku a ser planiá p’e Haitiano Sergio Francilon ta nada mas ni menos ku un atentado kontra kurason di nos pais.

I pa bisa mesora loke nos tin na kurason; pa Korte dikta un kastigu di 10 aña só kontra e strañero ku a gosa di hospitalidat di nos pais kaminda el a traha plaka pa kria su famia na Haiti i na Kòrsou, ta manera un bòftá den kara di nos pueblo.

Loke ta laga e bòftá pika mas tantu t’e supuesto kastigu finansiero di 50.000 florin ku Korte a dikta ku e mester paga.

E suma ei no ta ni komparashon ku e komo 42 mion florin na daño material ku e homber a manda su kompinchenan bai kousa kontra Landsontvanger.

No kabe duda ku e Huesnan ku a yega na e konklushon ei lo tin argumentonan perfekto pa hustifiká un kastigu ku nan a dikta ku man di felpa pero den e kaso aki nan por a interpreta e lèter di lei pero e ta den kontradiksio ku e espiritu di nos pueblo.

Un hende, kualke sea su nashonalidat, no por kousa un daño finansiero asina grandi i sali praktikamente liber en komparashon ku e krimen ku ela orkestrá.

Es ku no ta kima so el a laga kima Landsontvanger, pero ku e homber aki tabata un fábrika di kometé krimen i delitonan ku pa kualke un di nan tambe e por a haña 10 aña di kastigu.

Ku masha kreatividat kriminal el a perhudiká kompania di gobiernu ku ladronisia di awa i koriente i nos tin sigur ku si konta kuantu tempu ela komete e robonan aki, esei ya kaba ta suma e montante di 50.000 florin ku e tin di paga.

I komo insulto riba e daño material ku el a kousa i ku a sosode na momento ku menos pais Kòrsou por karga e karga finansiero aki, tin ku bai hospedá e homber den SDKK a rason di sigur 100 florin pa dia durante un periodo di 10 aña x 12luna x 365×12 dia.

Talbes hopi hende no ta kompletamente konsiente dje daño grandi i profundo ku e gèngster i su kompinchinan a kometé kontra nos patria mama pero e asuntu ta hopi grave.

Ta masha hopi plaka Landsontvanger no por a kobra djis pa e malisia dje kriminal aki kende a abusá di e hospitalidat di nos isla pa kometé e alto krimen aki.

Talbes p’e Huesnan ku a yega na e kastigu aki tin e mentalidat Europeo ku definitivamente no ta kuadra ku e mentalidat Karibense di nos pueblo i lo ta bon pa un gobiernu realmente patriotiko laga investigá un dia ta kon ta kibra e brecha ku ta e divishon di mentalidat entre nos komo pueblo  Karibense i e Huesnan Hulandes ku tin un óptika totalmente diferente for di nos pueblo.

Di otro banda mester bisa ku e situashon aki ta nos mes falta pasobra no ta eksisti ku no tin sufisiente mente inteligente na Kòrsou ku por studia i domina e materia di bira Hues.

Sea kual sea, nos no por a laga e okashon aki pasa pa ekspresá nos mas profundo indignashon ku e krimen riba su mes i e kastigu di felpa ku Francilon a haña.

Kada sekònde ku e homber aki ta permanese riba nos suela, ta un insulto pa nos dignidat i honor i no ta un señal di debilidat si hisa koroto pone bordo di barku  barka manda su pais. Si nan kaba kune fisikamemente ta su mes hendenan a perkurá pa su fin.