Minister Maduro a haci e ‘closing statement’ pa tayer riba recuperacion economico organisa pa Aruba y OECD

Recientemente Gobierno di Aruba hunto cu e Organisacion pa Desaroyo Economico OECD,  a organisa un tayer pa intercambia idea cu paisnan den nos region con pa sigura un bon recuperacion di paisnan chikito di e efectonan di e pandemia.

N’e ocasion aki Minister Xiomara Maduro di Economia tabatin e placer pa duna un remarke final den cual e mandatario a gradici tur presente pa nan aporte positivo na yuda otro cu conocemento con pa supera e efectonan di e pandemia.

E crisis ta brinda un oportunidad unico p’asina trata na yega na un crecemento economico mas balansa den liña cu e metanan di desaroyo sostenibel SDG’s y pesey e tipo di intercambio di conocemento aki entre paisnan den desaroyo ta di sumo importancia.

MinisterXiomara  Maduro a gradici OECD pa brinda e plataforma pa haci e intercambio posibel y a invita tur presente pa ban sigui inova y ban sigui actua liher pa replica y comparti nos esfuersonan.