Pakico te awe e carta fecha 20 di juni 2016 no a ser contesta te ainda

AWEMainta den su investigacion periodistico riba e storia di Fundacion Lotto pa Deporte a topa cu un carta sumamente interesante fecha dia 20 di juni 2016 di e ex Minister di Deporte, Alex Schwengle dirigi na Lotto pa Deporte.

E carta aki, cu papia pa su mes, ta trata e topico di e traspaso di e operacion di loteria na Aruba den man di Canadian Bank Note (CBN) na 2011. Esey a tuma lugar dor di e mesun hendenan cu actualmente ta den Raad van Toezicht di Lotto.

Informacion no confirma ainda ta mustra cu nunca Lotto pa Deporte a contesta e carta aki. Atrobe ta un prueba cu e hendenan aki t’asina arogante y sin respet cu nan a tuma e costumber di no contesta cartanan di mandatarionan di Pais Aruba. Ta bin aserca cu ta parse cu hamas y nunca e hendenan aki lo por contesta e carta aki na un manera profesional y satisfactorio.

Pregunta clave cu ta surgi anto ta pakico un mandatario di Pais Aruba ta manda un carta asina pa Lotto pa Deporte. Por algo sera.

Pa decora e bolo cu e cherry e momento ey, cu a prepara y manda e carta aki pa Lotto, t’e mesun actual Director di Lotto pa Deporte, Roland Tuitt, ex politico di Sint Maarten, tabata consehero di e ex mandatario pa asunto di Lotto.

Tuitt a tuma e custumber di gasta placa di deporte pa traha video clips pa pone riba social media. Awel pueblo di Aruba como tribunal di pueblo ta reta Roland Tuitt, Silvio Janga, Elias Kock, FLavio Faneyte y Tony Kamperveen pa contesta e carta aki den un video clip hunto cu un jingle. 

By the way mirando tur e desaroyonan rond di Lotto pa Deporte un hende integro y respetabel  lo a tuma honor na su mes y entrega retiro di e Raad van Toezicht di Lotto pa Deporte.