Parlamentario Ricardo Croes no ta confia Minister Dangui Oduber y tampoco Crisisteam

Partido RED ta partner den un coalicion cu pa di tantisimo bes, lider di e parido aki ta cuestiona y hasta insulta den un forma hopi serio.

Ricardo Croes un biaha mas a cuestiona integridad y capacidad di e Gobierno cu su persona ta sostene, pero manera semper, Ricardo Croes ta kere cu pueblo mester di un Gobierno y pesey e ta keda colga te ora cu e no por colga mas.

Aruba ta den un pandemia, cu henter pueblo anhelando un solucion, anhelando trankilidad y mas cu tur cos, anhelando pa tur cos bira normal bek manera e tabata prome cu e pandemia a bati na porta di e isla.

Mientras cu Gobierno di Aruba, Gobierno di Merca, Gobierno di Hulanda, Alemania, Spaña y cantidad di otro paisnan mas ta trahando duro pa suministra vacuna na tur hende p’asina alivia e presion grandi cu tin, aki na Aruba un partido cu ta sostene Gabinete Wever Croes, ta dicidi cu e no ta confia pa nada e campaña di vacunacion.

No solamente Ricardo Croes ta bisa cu e no ta confia e vacuna cu ta wordo suministra na Aruba, pero tambe ta menciona cu e no ta kere ni loke Minister di Salud, Dangui Oduber, ni DVG y ni Crisisteam ta bisa, ya cu e no ta kere den nan.

Pero na mesun momento e ta sigui duna su sosten n’e maneho aki como representante di pueblo den Parlamento, pero no kier lucha p’e mesun pueblo aki y ordena Gobierno pa para cu e campaña aki.

Minister Dangui Croes a bin dilanti y mustra su lamento p’e posicion tuma pa Ricardo Croes, ya cu contrario na Ricardo, ta experto- y cientificonan grandi ta tras di e vacuna aki y cu Ricardo como parti di e Gobierno actual, tin e deber di yuda motiva tur hende pa busca e vacuna.

Sinembargo mey mey di tur e conmocion cu Ricardo a percura pe den ultimo dianan aki riba social media, tin cu corda cu no ta prome bes cu su persona ta habri afo contra di su propio Gobierno, ya cu den pasado caba, para dilanti di Parlamento, a declara cu Cocolishi ta yena cu Friends & Family y recientemente a denuncia nombramento di famia di un Minister den servicio di Gobierno.

Durante di e reunion caminda su persona, hunto cu Rocco Tjon y Alan Howell, tur lider di nan fraccionnan, a presenta un mocion pa entrega un mocion di desconfiansa contra e tempo ey, Ministrer Marisol Lopes Tromp.

Cu su firma bou di e peticion pa reunion, durante di e reunion mes Ricardo a condena e acto aki, mustrando cu su fraccion, esta su persona y su Minister Rudy Lampe, no tin ningun problema cu Marisol Lopez Tromp.

Durante di un di dos intento pa baha Minister Lopez Tromp, ora cu a presenta un mocion di desconfiansa contra di e Minister durante di un reunion relaciona cu spearfishing, Ricardo Croes a bandona sala di Parlamento pa di e forma aki percura cu no tin quorum p’e reunion continua y a declara tambe despues cu e no ta presta su mes p’e tipo di weganan politico aki.

Sinembargo algun dia despues, Ricardo Croes a bay di acuerdo como lider di su partido den Parlamento, pa Prome Minister manda un carta pa Gobernador den cual ta pidi pa retiro di Marisol ya cu no tin confiansa mas den su persona y ningun hende por traha cune. Pues e comedia di e fin di siman aki, ta otro indicacion cu e concepto di Ricardo Croes pa sostene un Gobierno, ta simplemente algo cu kisas e mes no ta kere aden of no sa con e ta hinca den otro.