Patruya di polis a accidenta, durante un persecusion

Diadomingo den careda di 1’or y mey di madruga, un patruya di Polis durante un persecusion ta accidenta. Esaki a sosode riba e caminda principal di San Nicolas pa Oranjestad, poco pariba di ex. Cuts and Curve, na Savaneta.

Un chauffeur di un Toyota Rav tabata core hopi iresponsabel entre Savaneta cu Pos Chikito, Polis tabata sigui’e, pero cada rato tabata perde for di bista.

Ta for di den oranan di atardi caba Polis tabata buscando e Rav shinishi aki. Dado momento Polis a stop di persigui’e pa motibo cu nan sa ken e ta y unda e ta biba, pero sin resultado.

Durante Toque de Queda, un biaha mas e chauffeur a dicidi di subi caya cu su auto, e tabata coriendo lus paga. Un patruya di Polis a dune un señal p’e para, pero un biaha mas e no a respeta esaki y a sigui core.  Polisnan a bay para den e area di su cas pa mira si e ta bay su cas.

E chauffeur iresponsabel aki a keda core den Savaneta, Pos Chikito y becindario. E auto tabatin un tire flat, ni cu tire flat e no a stop di core rond. Un patruya di Polis cu a bay sigui e Toyota Rav, a perde control, dal contra un cura di cas y a kibra e front di e auto di Polis.

Pa motibo cu ta trata di un auto di dienst, specialista di trafico mester a bay n’e sitio pa haci e investigacionnan necesario. Takelwagen a transporta e patruya di Polis.