Seleccion di Aruba ta perde ‘sin pena ni Gloria’ den clasificatorio pa mundial

Usando un expresion conoci di e conocido narador deportivo Janchi Tromp (q.ep.d), tin cu anuncia cu e seleccion di futbol mayor di Aruba, a sufri un derota humiyante contra e seleccion di Surinam cu anotacion di 6-0.

Un derota cu ya caba ta pone e posibilidadnan pa logra clasificacion p’e siguiente buelta den hopi dificultad y caminda Surinam ta logra su di dos triunfo den e serie aki.

Mañan diamars Aruba ta enfrenta e ekipo di Bermuda y lo ta un wega cu e mester gana pa mantene posibilidad ainda habri, mirando cu ainda tin cu topa cu e seleccion di Canada.

Sopresivamente despues di e partido, federacion di futbol AVB ta emiti un informacion mustrando cu e seleccion a haci su maximo esfuerso y a representa Aruba dignamento den e wega contra Surinam, algo cu simplemente un federacion cu ta respeta su mes no mester haci.

Ni maske cuanto bolter e asunto of trata di “praat goed” algo cu a bay horible robes, e no ta drecha e hecho cu seleccion di Aruba a mustra hopi malo diasabra anochi.

Riba social media por a scucha expresionnan manera cu Surinam ta completamente professional, pero si t’esey t’e pensamento y e excusa, e ora no mester ni participa na un eleminatorio asina, ya cu ora cu yega mundial of mas leu den e serie clasificatorio, tur ta profesionalnan.

Hecho ta cu AVB a usa ultimo dianan pa haci un presentacion estilo profesional, presentando e seleccion den prensa y haciendo hopi promocion, pero diabierna anochi no por a mira net nada di loke e promocion aki a priminti na pueblo fanaticonan di futbol.

Stanley Menzo a wordo presenta cu gran fanfaria, a papia hopi di su calidadnan, pero den e wega di diasabra, den ningun aspecto por a mira algo di su trabou, kico su trabou a conduci n’e wega di e seleccion di Aruba.

No tabatin coordinacion entre e liñanan, practicamente e liñanan no tabata cera na tempo, no a sostene otro caminda e tiki besnan cu bay den atake, ta solamente cuater pa cinco hungador ta avansa suficiente pa por tin algo serio.

Den e prome tempo e seleccion di Aruba a pasa middenlijn na solamente 9 ocasion cual ta mustra caba e dominio completo di Surinam den medio campo.

Aruba a para henter prome tempo cu practicamente 8 pa 9 hungador den of cercania di doelgebied, pero asina mes cada bes tabatin hungadornan di Surinam cu tabata haya espacio y keda liber y asina por sigui menciona cantidad di otro punto mas cu tabata motibo p’e sentimento di decepcion.

A spera mucho mas di loke t’e esfuerso cu AVB a bin ta propaganda di e seleccion y cantidad di otro cos cu e federacion ta haciendo p’awor por hunga rol cu Surinam  su hungadonan ta profesional, simplemente no ta algo aceptabel.

A hinca un seleccion den otro sin cu tabatin Campeonato y sin e plan ta pa percura pa crea un seleccion cu por bay hopi aña, anto e proceso di rehubenece e seleccion tin cu caminsa awor y no despues.

E seleccion tin varios hungador cu ta den nan ultimo dianan di nan carera anto laga talentonan hopi hunga, laga nan sigui forma nan mes y gana na experiencia y sin duda mester mira mucho mas for di e aporta di un coach manera Stanley Menzo tin cu aporta den un wega di e seleccion.