Taxi pirata ta keda activo, na Tanki Leendert Polis a detene otro taxista pirata

Diasabra pa mas o menos 2’or di merdia, Polis a topa un auto sospechoso riba e caminda di Tanki Leendert pa Paradera. Mesora a para e auto y a resulta cu ta trata di un taxi pirata.

E taxi un Toyota Corolla tabatin varios pasahero. Polis mesora a hala atencion di e personanan y despues a detene e chauffeur y a confisca e auto.

Taxi pirata ta un fenomeno cu ta existi pa hopi tempo caba na Aruba, Polis constantemente ta garanan y awor a detene e taxista pirata y ta confisca su auto.

Taxi pirata ta ora un persona sin permiso di taxi ta core riba cierto caminda principal y ta pasa piki pasahero para canti caminda y ta transporta nan di un caminda pa otro, anto ta cobranan p’e servicio aki. E chauffeur aki no tin permiso di taxi, pa por cobra pa transporta hende.

Un ruta cu hopi biaha Polis sa topa cu taxinan pirata, t’e caminda di Misa di Playa bay direccion Noord. Pero e taxistanan pirata aki ta move rond di Aruba tambe.

Segun nos a compronde, e pasaheronan ta para cant’i caminda y e taxista pirata ta haci un señal cu nan, e pasahero ta duna e taxista pirata señal bek. Anto e ora e taxi pirata ta para y  ta subi e pasahero den su taxi, hibe su destino y cobre pa su servicio.