Antes resultado den 1 luna y awor den 1 dia por diagnotica cancer na pecho

Laboratorio Nacional di Aruba conoci como LabHOH a logra algo grandi pa Aruba y region, esta logra validacion di SISH (Silver in Situ Hybridisation), un tecnica moleculario p’asina por duna resultado di test na pashentnan cu tumor na pecho den menos di 1 dia.

Despues di hopi esfuerso y dedicacion a logra pa pashentnan aworaki ta haya nan resultado mas liher y alabes ta reduci gasto. Loke antes tabata paga pa resultado di 1 pashent aworaki ta cubri gasto di 50 pashent. 

E logro aki sigur ta grandi pa p’e pashentnan cu tin cancer na pecho. Mas o menos 15% di hende muher cu tin cancer na pecho, hopi biaha tin e gen Her 2 neu amplifica, Zowi Figaroa, analist pathologie LabHOH, a duna di conoce. Esey t’e gen cu ta haci e cancer na pecho mas agresivo.

Ta importante p’e gen aki wordo diagnostica, p’asina por cuminsa mas liher cu un tratamento specifico.  

Den pasado tabata manda e testnan afo na Erasmus Universiteit, pero awor ta haci’e akinan mes na Departamento di Patologia na LabHOH. Antes e tabata dura un luna p’e pashent por a haya su resultado y awor ta dura un dia. Tur esaki ta danki n’e mashin BenchMark Ultra cu ta haci esaki posibel aki mes.

Tres luna pasa LabHOH a cuminsa cu e validacion. LabHOH mes a haci e diagnostico aki y e mesun test tabata manda Erasmus Universiteit pa nan diagnostica tambe. A compara tur e resultadonan cu esun di Erasmus Universiteit y tur a sali identico.  

Loke a haci e proceso aki facil tambe ta cu nos tin e mesun mashin cu Erasmus Universiteit, esta e BenchMark Ultra, cu ta haci cu por a compara resultadonan mas facil.

LabHOH ta bay sigui traha cu Erasmus Universiteit pa seis luna mas. Lo sigui compara e materialnan di pashentnan di tanto Erasmus Universiteit como esnan di LabHOH. Despues di seis luna si tur resultado ta mescos LabHOH lo sigui cune riba su mes.  

E tecnica moleculario ta habri porta pa LabHOH, ya cu nos t’e prome den region pa haci esey posibel. P’awor LabHOH a cuminsa cu e tumor na pecho y dentro di poco lo kier uza e mesun sorto di tecnica aki pa diagnostica otro tumornan tambe manera p.e. di tripa, pulmon y hopi mas.