Awe tardi lo bay Parlamento pa mira con ta bay bringa COHO

Ya for di aña pasa, Prome Minister Evelyn Wever Croes, a dicidi di entrega autonomia financiero, hudicial educacion y otronan mas, den man di Gobierno Hulandes, ora cu el a firma e Landenpakket.

Den e acuerdo ey, Prome Minister a bay di acuerdo pa Gobierno di Reino, institui un departamento cu lo carga e nomber di COHO, cu lo supervisa y atende tur asunto cu tin cu maneho di finansa caminda practicamente Gobierno no tin e decision final riba e maneho cu e kier hiba of con e kier financia esaki.

Es mas, Parlamento di Aruba, principalmente oposicion cu ta fraccion di AVP, a cuestiona e hecho cu Prome Minister a bay Hulanda bay firma acuerdo, sin cu Parlamento cu t’esun cu ta  controla maneho di Gobierno, a wordo poni debidamente na altura di kico e acuerdo aki ta encera.

Ta bin acerca cu te dia di awe ainda Parlamento no tin conocemento of a wordo informa di contanido total di e Landenpakket cu a wordo firma pa Evelyn Wever Croes, caminda entre otro a firma pa trahadornan publico entrega 12.6% di salario, cu lo reduci den gastonan medico cu 5 miyon pa luna, loke ta nifica un suma di 60 miyon pa aña.

Prome Minister a priminti sindicatonan y otro instancianan den cuido medico cu e lo bay hiba un dialogo cu nan, pero te dia di awe nada di dialogo, nada di informacion y tin cu asumi cu e medida di Gabinete Wever Croes pa saca 60 miyon for di cuido medico, ta un hecho cu no por mishi cune mas.

Awor siman pasa Raad van State a bin emiti un raport of conseho, den cual ta wordo mustra cu e institucion COHO, uno contra Statuut y ta algo inconstitucional, pues e no tin un base legal loke a bolbe lanta un serie di pregunta cu mester clarificacion ariba.

Un di e reaccionnan mas sorprendente riba e raport di Raad van State, tabata di Prome Minister di Aruba, kende cu gran entusiasmo hasta a anuncia cu su Gobierno lo bay hinca un comision den otro cu lo mester atende riba e asunto di COHO p’asina trece cambio den esaki.

Net Prome Minister Evelyn Wever Croes, net esun culpable, kende a core firma e acuerdo cu Hulanda, sin cu su propio conseheronan huridico a atende of studia e asunto aki, awor ta dicidi cu ta momento pa bay lucha contra di COHO, mientras cu e tabatin tur tempo pa haci esaki caba, pero simplemente nunca tabata cumpli cu palabracionnan cu el bin ta haciendo cu Hulanda.

Mas ainda tin tur indicacion cu henter e asunto di control aki, e creaccion di COHO y e decision di Hulanda pa Aruba cambia e ley di admision, a bin na vigor pa Hulanda eherce un tipo di control riba Gabinete Wever Croes, cu simplemente tin tres aña sigui cu e no ta cumpli cu palabracionnan haci cu tanto CFT como protocol firma cu Gobierno Hulandes for di 2018 caba.

Despues di a firma tur e acuerdonan aki, despues di a acepta cu Hulanda a kita autonomia di e pais, awe 2’or di merdia Prome Minister hunto cu otronan di su Gabinete lo bay duna Parlamento un bista di e scenario nobo despues di e  raport di Raad van State.

Awe kisas Prome Minister ta bin busca mandato for di Parlamento, cu enfasis riba kisas, pa bay atende cu e asuntonan aki y bay busca un otro forma pa atende cu e asunto di prestamo, den un forma cu Aruba ta keda cu autonomia.

Sinembargo no mester carga mucho speransa ya cu Prome Minister ta bin pidi un Parlamento cu e mes no a duna mucho informacion riba e funcionamento di COHO den su totalidad, pero awe e tin mester di mesun hendenan aki cu el e mal informa for di basta tempo.