Comisario di Polis Trudy Hassell manda cas cu vacacion obligatorio

Ta bon pa menciona cu e situacion cu Comisario di Polis, Trudy Hassell a bin haya su mes diabierna ultimo, no tin nada pero absolutamente nada di haber cu Director di AWEMainta, Toko Winklaar ora cu el a dicidi di bay ricibi e homber Juan Quant, alias Blauw na salida di esaki for di prison.

E presencia di Comisario di Polis, Trudy Hassell a lanta hopi pregunta riba su rol n’e momentonan ey, como un funcionario halto di Cuerpo di Polis, creando un tipo di duda den e rol di henter e sistema den e tipo di situacionnan aki.

AWEMainta a publica e informe aki mescos cu varios otro media den su edicion di diasabra, pero pa motibo di contenido di e publicacion a mustra cu tin un “horen zeggen” riba su relacion cu Blauw, esaki awor a bira e topico cu sra. Hassell kier usa pa defende of cubri su presencia diabierna mainta pafo di KIA.

No solamente su presencia a ser cuestiona, pero e hecho ainda mas serio ta cu e Comisario di Polis a presenta cu auto di servicio di Cuerpo Policial, dunando asina e impresion cu loke el a haci lo tabata parti di su trabou, pero su dia siguiente den un conferencia di prensa cu su persona a convoca dilanti di KIA un biaha mas, Comisario Hassell a confirma cu el a bin como conoci di e homber pa papia cune riba su comportacion awor cu e ta bandona prison. Aki tambe e Comisario di Polis a convoca dicho conferencia, sin a notifica su superiornan di esaki y atrobe a bay cu e auto di Polis.

Ayera mainta Leiding di Korps a dicidi di manda Comisario Trudy Hassell cas cu vacacion obligatorio y si su persona no acepta esaki, e lo haya un suspencion pa presenta pia di trabou caminda e lo no tin mag di drenta ningun Warda di Polis pa un tempo stipula.

E Comisario a dicidi di acepta su vacacion obligatorio pa supuestamente permiti un investigacion tuma lugar riba su comportacion diabierna ultimo y e hecho cu el a bay n’e sitio cu auto oficial di dienst, sin notifica su superiornan.

Pues no ta AWEMainta su a cuestiona e rol cu e Comisario a hunga den e situacion dilanti di KIA, pero awor Mando Policial tambe kier haya claridad riba tur loke a tuma lugar y riba e reaccionnan negativo cu Polisnan a ricibi p’e comportacion di Trudy Hassell.

Ayera un biaha mas e Comisario lo a reacciona riba AWEMainta den otro intento cu nos ta mira otro intento pa desvia for di henter e situacion cu su persona a crea.

No solamente for di den comunidad, pero tambe for di propio seno policial, AWEMainta a ricibi hopi reaccion y sosten den e asunto aki y awor tin cu spera resultado di e investigacion of cualkier otro procedura cu lo tin cu tuma lugar.

Loke internamente a ser seriamente cuestiona, te hecho cu Trudy Hassell a demanda cu AWEMainta y Toko Winklaar tin cu disculpa su mes cu su persona, pero tambe pa cu Cuerpo Policial, Mando Policial y Minister di Husticia, siendo ningun momento AWEMainta a cuestiona trabao di Mando Policial y di Ministerio di Husticia. Awor e ta bay cu vakantie obligatorio, lagando e auto di servicio na Warda di Polis.

Minister Andin Bikker a confirma cu Trudy Hassell a baha cu vakantie, siendo el a caba di bay cu vakantie. Riba nos pregunta cu si e tabata un vakantie obliga, el a contesta “Mi no tin mas comentario” lagando e contesta habri pa interpretacion di un y tur. Contal cu na trabou e no ta y cu e auto di dienst nechi para den cura di ward’i polis pendiente pa dia su vakantie termina.

Hecho ta cu den seno di Cuerpo Policial Aruba henter e asunto aki no a cay den bon tera. Ta sinti cu regularmente e cuerpo ta hay’e den noticia negativo dor di actuacion di e mesun persona.

E declaracion di Chaldira Vis riba red social, siendo e victima di e acto criminal di Blauw, tambe a haya hopi atencion y a gana mas simpatia den comunidad. Es mas, pueblo ta mas na fabor di Vis cu ta para na banda di Hassell.

Specialmente despues di e Comisario di Polis a declara cu e ex-preso tin derecho riba un di un second chance den su bida. E victima a lamenta cu e si no a haya e chens aki, pasobra e lo keda paralitico pa semper.