Despues cu Minister Bikker a anuncia cu Departamento di Inmigracion lo bira un cuerpo riba su mes, Integridad di un hefe na Inmigracion a ser cuestiona

Tabata algun dia pasa, cu ainda Minister di Husticia, Andin Bikker a hiba e bon noticia pa personal di Inmigracion, cu a lo bira un Cuerpo riba su mes, pa awor dicidi cu Lori Simmons, kende tin como 40 aña trahando na Inmigracion, for di siman pasa e no ta bon-bini mas.

A desactiva su badge, despues cu a bin un raport di Servicio di Inteligencia di Aruba (VDA) den cual ta cuestiona su integridad. Como tal Minister Bikker a hay’e ta kita e status di confiansa cu e hefe tabata gosa di dje. Un que otro tin di haber cu un “veiligheidsonderzoek” cu a sali malo p’e empleada di tanto aña y ta serca di baha cu pensioen.

Informacion cu nos tin ta cu Lori Simmons, cu ta casa di ex-polis Peter Simmons, ta encarga mescos cu otro pa atende cu frontera na entrada oficial di nos isla. Awor aki e no mag di yega Aeropuerto mas pa eherce su trabou, esey no kier men cu el a keda suspendi.

A duna Lori Simmons di conoce cu e por por bay traha na oficina di Inmigracion na Vondellaan, pero e no kier y como tal el a prefera di tuma vakantie.

Mester menciona cu den pasado caba a mand’e bay traha na waf. A haci un investigacion contra dje na aña 2017 cu a sali malo y di forma disciplinario a bah’e den rango como castigo.

Pa loke ta trata e investigacion di inteligencia, na momento cu a entreg’e e raport final, el a opta pa haci uzo di su derecho pa apela contenido di e raport. Esey ta un posibilidad den ley. Consecuentemente un Hues imparcial lo trata contenido di e raport, lo repasa e investigacion y locual a sali afo y duna un opinion riba dje. Esey lo sosode e siman aki ainda, pa mira si Veiligheidsdienst Aruba por a faya den su investigacion of si berdad e empleado publico ta carece di integridad p’e por mantene su funcion.

Pero lamentablemente esnan conserni no a splica unda Lori Simmons a faya. Di otro banda mester menciona cu na trabou e ta hopi aprecia pa su coleganan cu n’e momentonan aki ta hopi desapunta cu e accion cu a bolbe tuma contra Lori Simmons. Hasta tin disgusto den Inmigracion Aruba, pasobra a papia entre coleganan di pone trabou plat.