E por mira su yiu hòmber mitar dia kada dos siman

WILLEMSTAD – Un tribunal na Rotterdam a rechasá e petishon di un homber Kurasoleño ku ta biba na Hulanda pa bira voogd di su yiu despues ku e mama a muri.

Despues di morto dje mama, e homber kier a rekonosé e yiu legalmente, pero Hues a rechasá esaki kategorikamente, pasobra si na bida e no kier a hasi esei, despues di morto no tin mester mas.

Tempu e mama dje yiu tabata na bida e muhé a pasa den un fièrnu ku e homber i awor ke bira representante legal ku por disidi tur kos riba e yiu.

E yiu no ke esaki apsolutamente pasobra e homber ta abusador ku hasta ta bati’é ku faha.

Ademas e tribunal a husga ku si nan duna e homber derechi pa rekonosé e yiu, esei lo krea un situashon sosial sikologiko masha negativo p’e mucha i kaminda e por keda reklamá dikon e tanta i e abuelo sí por ta voogd i e nò.

TATA LASTIG

E homber direpente a bira religioso i el a konta Hues ku e mester gana e bataya kontra e tanta i e abuelo ku Dios su poder.

E homber ta kere ku e por trata e yiu bon, pero e tribunal a mira kaba ku e kaso lo bira un drama.

Ta sosode ku e tanta a deklará den Korte ku e ke bin Kòrsou ku e mucha pasobra foi tempu su ruman tabata na bida, el a dediká hopi tempu na yuda kria e mucha.

Ademas e ke biba resto di su bida na Kòrsou i e mucha tambe tin su relashon emoshonal ku Kòrsou apesar ku el a nase i biba na Hulanda.

ADRES SEKRETO

E kaso t’asina intenso ku e abuelo ku tambe ta voogd, ta kedando na un direkshon sekreto na Hulanda pe homber no molesti’é.

Tempu e mama tabata na bida, nan tabata biba na Alkmaar i fo’i dia e mama a muri, ta masha rapòrt korte a laga traha pa no faya ku nan desishon.

E mama difuntu tabatin un relashon amoroso ku otro te ku september 2019 i a haña un yiu dje homber.

Despues ku e mama a muri, Korte a disidi ku e tanta i su abuelo ta keda voogd i e mucha ta keda biba serka e tanta.

Despues ku Korte a haña rapòrt di trahador social ku preferibelmente e homber keda leu for di e mucha, e homber a apela e desishon aki.

Na lugá di laga e tanta ku e abuelo keda ku e mucha el a pidi pa nombra su persona komo voogd pe keda henter siman serka dje.

E mama tabata biba huntu ku e homber ku su bou di un dak, pero tur dia ta gera mundial verbal tabatin.

September 2019 e muher a fada dje homber i a mand’é bai fliet i a bin Kòrsou, pero a laga e yiu serka e tata.

E mama tabatin kanser terminal. Envista di esei e tata a purba konvensé e mama pa e rekonosé e yiu i pe keda ku e yiu despues di morto dje mama. E mama a ninga literalmente te na morto.

E hòmber mientrastantu tabatin un amante nobo na Hulanda i kier p’e yiu keda serka dje, pasobra e ta bai skol ‘speshal’.

E tanta i e abuelo a splika Korte ku ultimo añanan nan tabata bai Hulanda tur aña pa seis luna pa yuda e mama ku e yiu.

E tanta i e abuelo a konta Korte ku apesar di kondishon dje mama, e homber tabata pleita kune tur dia i tabatin zundramentu i hasta violensia fisiko kontra e difuntu.