Minister President Wever-Croes y Minister Maduro a reuni cu Fitch riba e situacion economico y financiero di Aruba

Algun dia atras Minister President sra. Evelyn Wever-Croes y Minister Xiomara Maduro a reuni cu e compania di rating Fitch, kendenan n’e momentonan aki ta evalua Aruba su sistema financiero y economico.

E aña aki Aruba su sistema financiero y economico a wordo evalua caba pa Fondo Monetario Internacional IMF y e compania di rating Standard and Poor’s, y e resultado tabata satisfactorio pa nos pais.

Nos ta spera cu Fitch tambe por reconoce e esfuerso grandi cu ta wordo haci na Aruba pa por surpasa e retonan cu Covid-19 a trece pa nos pais.

Puntonan importante t’e yudansa cu Gobierno ta brindando por medio di FASE, Sosten Financiero pa kwartaal y Subisidio di Salario cu ta sigui pa full aña 2021. E acuerdo cu Gobierno di Aruba tin cu Hulanda p’asina facilita e fiansanan necesario tambe ta importante.

E hecho cu Aruba ta vacuna ta un punto importante pa recuperacion economico cu tambe ta wordo considera den e evaluacion. Na comienso di april Gobierno lo ricibi e resultado di e evaluacion di Fitch.