Prof.dr. Gerhard Hoogers tambe a rechasá COHO

DEN HAAG – Otro figura klave i di gran influensia na Hulanda ku meskos ku Raad van State tambe a rechasá e asina yamá Rijkswet Caraibisch Orgaan voor Hervorming en Ontwikkeling COHO redondamente, ta profesor doktor Gerhard Hoogers.

E profesor aki a remarká ku di su banda tampoko nunka mester aseptá un momento di bobedat den leinan di e konstitushon di Reino Hulandes i mas aleu segun e profesor aki por ilustrá e sirkunstansia aki a base di e komportashon di Sekretario di Estado Hulandes Raymond Knops.

Ya pa algun dia e Comishon Fiho di Parlamento Hulandes di Eerste Kamer ta pendiente di tratamentu di e proposishon di lei ku ta regla disputanan eksistente den Reino.

Pasobra Raad van State entre tanto a duna konseho den e kaso di e Caribisch Orgaan voor Hervorming en Ontwikkeling COHO.

E konseho ei naturalmente tabata sekreto debí ku e proposishon di e lei di reino no a keda presentá ainda ni na Tweede Kamer ni na Parlamentonan di Aruba, Kòrsou i Sint Maarten.

Pero segun  profesor Gerhard Hoogers despues ku ampliamente a sita for di e konseho di Raad van State, Gobièrnu Hulandes a tuma e desishon no usual pa pèrmití publikashon, loke entre tantu Raad van State a hasi, komo tal por tuma di forma kompletamente legal nota di e konseho di Raad van State tokante COHO.

Segun e profesor, e lei di Reino COHO ta un proyekto kontroversial. Ta trata aki di e tradukshon hurídiko pa regla palabrashonnan entre Hulanda ku Aruba, Kòrsou i Sint Maarten riba e kondishonnan na kua e islanan mester tene nan mes pa bini na remarke pa risibí sosten finansiero di Hulanda pa atendé e konsekuensianan di e pandemia di Corona riba e ekonomianan di e paisnan i nan presupuestonan.

Segun e profesor aki for di aña pasá tabatin konfrontashonnan polítiko entre Sekretario di Estado Raymond Knops, sostené pa un mayoria den Tweede Kamer, kendenan a presentá un pakete ku ta bai masha leu mes riba mesa.

Ta trata aki di un supervishon nunka bisto di parti di Hulanda riba e paisnan di Karibe, kendenan a konsiderá esaki tachamentu di e outonomia ku ta ankrá den Statuüt i meskos ta teme pa partinan di e areglonan di estado.

E konfliktonan aki aparentemente a keda pasifiká ku akuerdonan polítiko será fin di aña pasá i kuminsamentu di e aña aki (2021) entre e kuater Gobièrnunan ku algun adaptashon chikitu den proposishon di lei. Pero awor porfin tin e konseho di Raad van State di Reino.

Ounke ta un konseho riba kua a pensa mas ku kla riba dje i atrabes di kua a trata na salba kara di tur esnan konserní, riba puntonan di detaye tòg por spera ku konfliktonan riba e proposishon di lei lo lanta kabes atrobe.

Sigur awor ku resultadonan di e elekshonnan na Kòrsou lo kondusí na un gobernashon di Kòrsou notablemente reservá versus di Den Haag, kompará ku e Gobièrnu Rhuggenaath.

Segun profesor doktor Gerhard Hoogers den e konseho di Raad van State di alrededor di 20 página krítika fuerte ta keda ekspresá riba kasi tur aspekto di e areglonan.

Komo tal e rekomendashon di Raad van State ta pa no entregá e proposishon di lei na Tweede Kamer a ménos ku trese adaptashon n’esaki.

Komo tal e profesor ta konsentrá riba e aspektonan di e areglonan di aña pasá ku a atraé tantu atenshon, esta e pregunta tokante e espíritu kontradiktorio di COHO versus Statuut di e islanan di Karibe Hulandes.

Mas aleu segun e profesor ta te den final Raad van State ta ekspresá den su konseho riba e kuestion aki. Pero esei segun e profesor tin netamente di haber ku e delikado ku e asuntu aki i ku ta yama resistensia.

Asina ei segun Raad van State COHO ta haña kompetensianan ku tambe ta pèrtenesé na órganonan di e islanan i ku ta ankrá den Statuut, komo tal nan outonomia.

E binimentu huntu di kompetensianan aki segun Raad van State ta un eskoho mal pensá, pasobra e ta kondusí responsabilidatnan ku no ta kla. Esaki tambe pasobra, COHO i tambe e 3 Gobièrnunan mester duna kuenta i rason na diferente órganonan.

Ounke Raad van State no ta splika ku eksaktitut, t’asina ku COHO ta duna kuenta i rason na Minister di Asuntunan di Interior, siendo e Gobièrnunan ta responsabilisá nan mes na Parlamento.

Esaki segun e profesor i Raad van State lo por kondusí na konflikto entre COHO i Parlamento i lógicamente entre e Minister di Asuntunan Interior di Hulanda i e Parlamentonan di e islanan.