Sera diskushon numa, acusacion kontra KSE ta pistolada marka mayó

Willemstad – Komishon Supremo Elektoral a pone tur hende sinta stèif ku nan deklarashon detayá ku ta desbaratá e akusashonnan ku tabatin iregularidat ku e biyetenan di votashon.

Basá riba tantu sifranan históriko komo mil i un argumento falsu mas enkuanto votonan inbálido, no tin niun motibu organisatorio ni hurídiko pa un rekonteo total i òf pa yama un elekshon nobo.

E proseso elektoral ku Konseho Supremo Elektoral a organisá i supervisá ta basá riba mas ku 100 artíkulo di lei.

Kada paso ta papia palabra klá

Konseho Supremo Elektoral tei pa organisá elekshon di forma liber i transparente pa skohe 21 representante ku ta bai forma Staten.

Hecho ta ku den un elekshon tur partido no por gana: “Some win and some loose!” Ta p’esei e konseho a keda desepshoná ku algun miembro di nos komunidat a tilda Konseho Supremo Elektoral i su miembronan sin niun base supstansiá.

Pues, Konseho Supremo Elektoral ta rechasá e alegashonnan no fundá i sin prueba ku ta stroba e proseso finalisá.

E elekshon tabata limpi i valido i dia 11 di mei 21 miembro di Parlamento lo asumi nan funshon. Te ora yega asina leu Konseho Supremo Elektoral tin ainda hopi trabou pa hasi promé ku esei tuma lugá.

Akusashonnan infundá na miembronan di Konseho Supremo Elektoral, pero tambe na tur e otro trahadornan di urna, no ta kontribuí ku nada. Esei no ta kita ku Konseho Supremo Elektoral ta ta respetá tur e votadornan ku honestamente a haña e impreshon ku nan a vota riba un “stembiljet”  pretu ku blanku. Di otro banda, Kòrsou no mester laga institutonan demokrátiko bai pèrdí pa motibu di poko “bokón”, pasobra si un pilá esensial di nos demokrasia kai, nos por drenta un abismo sosial i konstitushonal grandi. Daño na integridat i konfiabilidat di e instituto ku ta responsabel pa elekshon, tambe ta nifiká daño n‘esnan skohí.