A duna prohibicion di entrada na 5 empleado di Guarda nos Costa debi na huida straño di un recluso

Relaciona cu un investigacion interno andando pa garantisa integridad di e departamento y su empleadonan, Guarda nos Costa a dicidi di prohibi entrada na 5 di su trahadornan. Pa duna espacio na un investigacion imparcial y sin metemento, a opta pa wanta e grupo aki na cas p’asina e ekipo di investigado por realisa nan trabou trankil.

Ultimo tempo Guarda nos Costa ta hopi mas ocupa cu normal, no solamente pasobra tin cantidad di detencion relaciona cu stranheronan cu ta keda Aruba di vakantie mas largo cu ta permiti, cu ta traha sin permiso of cu a yega Aruba sin pasa Migracion, pero tambe cu e procedura pa por deporta nan via buelonan humanitario ta tuma bastante trabou. Esey banda di e hecho cu ta renobando y ampliando e facilidadnan, mientras cu tin stranheronan deteni.

Y unda tin hopi trabou ta tuma lugar, por comete erornan. Pero ora sinti cu no ta un simpel eror sino por tin algo mas su tras, ta rekeri un investigacion profundo pa por sigura cu e departamento ta traha a base di normanan di integridad y mesun cos ta spera di cada un empleado trahando eyden. Ainda no tin ningun indicacion cu no t’asina, pero pa evita cu e percepcion ey por ta biba den comunidad, ta haci un investigacion tog pa subraya cu tur hende eyden ta di confia.

E medida ta encera un “toegang ontzegging” cu ta nifica cu e empleadonan no ta suspendi, sino cu nan no tin aceso na ningun edificio of vehiculonan di Guarda nos Costa. Ta un forma pa por baha e tension interno y investiga sin ningun sorto di presion. Directiva di Guarda nos Costa ta spera di por keda cla cu e investigacion pronto.