Caida di Gabinete Wever Croes a crea alivio grandi pa tantismo contradiccion

Pa: Victor (Toko) Winklaar             

Un Gobierno cu ta pretende di ta mitar integro no tin derecho di existencia.

Prome Minister Evelyn Wever Croes a haya su mes den un situacion hopi pisa ayera, pa trata di hustifica retiro di su Gabinete, na momento cu no tin hustificacion p’esaki pero a dicidi di sacrifica un flamante lider politico, esta Alan Howell den e caso aki.

Tabata hopi notabel ayera pa scucha Prome Minister papia di integridad, pa papia di bon gobernacion, pero en realidad esaki tabata algo cu su persona mester a haci for di momento cu el a dicidi di acerca e ex lider di POR, Otmar Oduber, un politico cu su partido a yama pa politico corupto, a inventa cantidad di apodo p’e persona aki, pa facilmente laga tur e acusacionnan cay djis pa drenta Gobierno.

No solamente Prome Minister Wever Croes, pero tabata algo horendo scucha Minister di Husticia, Andin Bikker haci un declaracion caminda el a gana Pontius Pilatus den labamento di man pa un asunto asina serio, ora cu el a declara cu e “union politico electoral cu POR, a resulta di ta uno hopi dificil, caminda cada bes a bin ta tuma nota di sorpresanan sumamente desagradabel.”

Aki sin duda e sorpresa desagradabel lo tabata e situacion cu a surgi cu ex Minister Marisol Lopez Tromp y tambe despues cu ex lider di e partido, Otmar Oduber, kende ta bou di investigacion pa asuntonan hopi serio.

E declaracion di Minister Bikker ta horendo sin duda ora cu e bisa cu e sorpresanan desagradabel y e hecho cu e tin cu soporta critica cu no ta relata na su persona, mustrando cu e no ta reconoce su mes mas den partido POR.

Pero Bikker ta co-fundador di e partido, ta su decision como politico pa bandona su partido Democracia Real y uni su mes n’e organisacion politico nobo di POR hunto cu Otmar Oduber y Marisol Lopez Tromp.

Awor cu baca a hoga, Minister di Husticia mescos cu Prome Minister ta trata di aleha nan mes for di algo cu nan tabata sa masha bon cu e no tabata bon, pero a guli manda abou p’asina por keda sinta riba stoel di Minister.

For di momento c’un miembro di bo propio Gabinete bin dilanti y informa Parlamento, no den cualkier reunion, pero un reunion publico di Parlamento, denuncia cosnan incorecto, cosnan coruptivo, no solamente di e ex Minister Otmar Oduber, pero tambe di otro miembroann di e Gabinete, e sentido di integridad no a lanta cerca Prome Minister y tampoco cerca Minister di Husticia.

Al contrario ta te cu ayera tabata e prome bes cu Minister Presidente a bin dilanti y declara cu a acusacionnan haci pa Minister Marisol Lopez Tromp, no por a wordo substancia  ningun momento.

Ta un hecho cu t’e propio Prome Minister a dicidi di bishita Gobernador pa haya un formula pa manda Minister Marisol Lopez Tromp cas y a logra den esaki, pero mientras cu na varios ocasion su persona a papia cu investigacion ta continuando, nunca mas a sigui cu investigacion riba maneho di e ex lider di POR pa loke t’e Ministerio di Infrastructura caminda cantidad di cos a bay malo y no corecto.

Ta for di e tempo ey Gabinete Wever Croes mester a entrega retiro, pero e interpretacion di e palabra integridad e tempo ey, no tabata existi y awor di repente Gabinete Wever Croes a bira asina gevoelig pa tipo di casonan asina pa hasta bay over na desolve Gobierno.

Na tantisimo ocasion a cuestiona integridad di Gabinete Wever Croes, cu cantidad di asunto incorecto cu tabata tumando lugar den seno di Gobierno, entre otro insulto tras di insulto di e lider di RED, Ricardo Croes cu a acusa su propio Gobierno di ta hibando un maneho pa sirbi ‘friends & family’ prome cu sirbi interes di pueblo y un cantidad di cosnan otro cu no ta bon.

A tolera Ricardo Croes, a tolera e caso contra di ex lider Otmar Oduber, caminda Prome Minister semper a insisti cu no por haci nada te na ora cu e investigacion  keda cla, pero ayera no a duna pober Alan Howell ningun oportunidad pa laga e investigacion tuma lugar.

Esaki ta duna e decision drastico aki e tendencia cu aki ta trata di un decision politico, un decision caminda ta busca na saca bentaha politico for di e situacion sacrificando Howell sin dun’e e beneficio di duda mescos cu a duna Otmar Oduber, ex Minister y ex lider di POR.

Ayera por a sinti den oranan di atardi y anochi te na ora cu toque de queda a permiti, un alivio grandi, un alegria inmenso den comunidad c’un Gobierno asina controversial for di prome dia, a yega su fin y ta habri caminda pa un proceso nobo pa pueblo eligi un Gobierno capacita cu por atende cu e asuntonan serio cu tin cu wordo atendi, den e forma cu pueblo no ta sali perhudica manera tabata e caso ultimo tres aña y mey.

Di otro banda, tumando nota di e noticia aki sr. Bikker a expresa su opinion personal: ‘Como ser humano un noticia asina ta yena bo cu tristeza, y ta subraya cu e union politico electoral cu POR a resulta di ta uno hopi dificil, caminda cada bes a bin ta tuma nota di sorpresanan sumamente desagradabel. Dado momento bo ta cansa di cada bes haya sorpresa desagradabel y soporta critica cu no ta relata na bo persona. Mi no ta reconoce mi mes mas den POR’. Pues el a dicidi pa distancia su mes for di partido POR y a sostene decision di Conseho di Minister pa entrega e retiro di e Gabinete y yama eleccion prematuro.